Մեծ Բրիտանիան իսկապես թաքնված բոյկոտ է հայտարարել Վլադիմիր Պուտինին այն բանից հետո, երբ Մոսկվայի և Լոնդոնի հարաբերությունները վատթարացան: Բրիտանացի ոչ մի դիվանագետ կամ պաշտոնյա ոչ մի ուղիղ կոնտակտ չի ունեցել նախագահ, իսկ դրանից հետո՝ նաև վարչապետ Պուտինի հետ 2007 թվից: Այս մասին BBC-ին հայտնում է բրիտանական կառավարության տեղեկացված աղբյուրը:
Դատելով այս ամենից՝ վերջին հանդիպումը տեղի է ունեցել 2007 թ.` «Մեծ ութնյակի» գագաթնաժողովի ժամանակ, երբ Պուտինը դեռևս նախագահ էր և բանակցել էր վարչապետ Թոնի Բլերի հետ: Հատկանշական է, որ այս հրապարակումը հայտնվել է Մեծ Բրիտանիայի վարչապետ Դևիդ Քեմերոնի` մյուս շաբաթ Մոսկվա կատարելիք այցից առաջ: Այս անգամ սպասվում է, որ Քեմերոնը հանդիպում կունենա Պուտինի հետ: Սակայն դեռևս հայտնի չէ՝ արդյո՞ք կհանդիպեն նրանք:
Ռուսաստանի և Մեծ Բրիտանիայի հարաբերությունները լարված են 2006 թվից, երբ Լոնդոնում սպանվեց ռուսական հատուկ ծառայությունների նախկին աշխատակից Ալեքսանդր Լիտվինենկոն, որը բազմիցս հանդես էր գալիս ռուսական հատուկ ծառայությունների և իշխանությունների քննադատությամբ: Նրան թունավորել էին ռադիոակտիվ պոլոնիում 210-ով: Նրա մահը հանգեցրեց դիվանագետների երկկողմանի հետ կանչի:
Անգլիան պահանջում է Ռուսաստանից իրենց տրամադրել այս գործով գլխավոր կասկածյալ, հատուկ ծառայությունների նախկին աշխատակից Անդրեյ Լուգովոյին, որը Լիտվինենկոյին հանդիպել էր վարակվելուց որոշ ժամանակ առաջ: Ռուսաստանը հրաժարվում է տալ իր քաղաքացուն:
Ռուս-բրիտանական հարաբերությունները վատթարացել են նաև Մոսկվայի կողմից Ռուսաստանում Բրիտանական խորհրդի փակման շուրջ ընթացող գործըթնացների պատճառով:
Ինչ վերաբերվում է ՌԴ նախագահ Դմիտրի Մեդվեդևին, ապա նրան բրիտանական իշխանությունները չեն անտեսում: Նախկին վարչապետ Գորդոն Բրաունը մի քանի կոնֆերանսների ընթացքում հանդիպել է նախագահ Մեդվեդևի հետ: Անցյալ տարի Քեմերոնը նույնիսկ զանգել է Մեդվեդևին, որ շնորհավորի նրան խորհրդարանական ընտրություններում հաղթելու համար:
Բրիտանացի պաշտոնյաները Քեմերոնի` Ռուսաստան կատարելիք այցից հարաբերությունների լիակատար «վերագործարկման» ակնկալիք չունեն, սակայն ընդհանուր հարաբերությունների ջերմացման և տնտեսական համագործակցության ընդլայնման հույս կա: BBC-ի աղբյուրները Լիտվինենկոյի գործով որևէ առաջընթաց չեն ակնկալում, սակայն բրիտանական կողմը հանդիպման ժամանակ այդ հարցը կշոշափի:
Նյութերը՝ ըստ NEWSru.com կայքի:
