Կիպրոսի Cyprus Airways ազգային ավիափոխադրողը 2023 թ. հուլիսի 2-ից կսկսի իրականացնել Լառնակա-Թբիլիսի-Լառնակա ուղիղ կանոնավոր չվերթը: Ինչպես տեղեկանում է Sputnik գործակալության վրացական ծառայությունից, այդ մասին հաղորդել են Վրաստանի Քաղաքացիական ավիացիայի գործակալությունում։
Գործակալության տեղեկատվության համաձայն՝ չվերթները կիրականացվեն շաբաթական երեք անգամ՝ երկուշաբթի, չորեքշաբթի և կիրակի օրերին։
Թռիչքների համար անհրաժեշտ թույլտվությունը վրացական գործակալությունը ավիափոխադրողին տվել է հունիսի 21-ին։
2016 թ. հուլիսին Charlie Airlines Ltd ընկերությունը շահել է Cyprus Airways ազգային ավիափոխադրողի ապրանքանիշը տասը տարի ժամկետով օգտագործելու իրավունքի հայտամրցույթը՝ համաձայնագիր կնքելով Կիպրոսի ֆինանսների նախարարության հետ։
Cyprus Airways-ը Լառնակայի միջազգային օդանավակայանից թռիչքներ է իրականացնում դեպի Եվրոպա ու Մերձավոր Արևելք: Cyprus Airways-ի բոլոր թռիչքներն իրականացվում են էկոնոմ դասի 180-տեղանոց Airbus A320 ինքնաթիռներով: