ՀՀ ԶՈւ Գլխավոր շտաբի նախկին պետ Օնիկ Գասպարյանի հետ հանդիպումը եղել է փակ նիստում, և Շուշիի անկման վերաբերյալ նրա ասածները հակասության մեջ չեն վարչապետ Նիկոլ Փաշինյանի խոսքերի հետ։ Լրագրողների հետ ճեպազրույցում այս մասին ասաց ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը։
Նա չբացառեց, որ հնարավոր է` Օնիկ Գասպարյանը կրկին կանչվի քննիչ հանձնաժողով, քանի որ յուրաքանչյուր հրավիրյալի խոսքերից հետո կարող է լրացուցիչ պարզաբանումների, հարցերի կարիք լինի։
«Մենք նիստի ժամանակ ինչ հարցեր ունեցել ենք, դրանց պատասխանները ստացել են նախկին գլխավոր շտաբի պետից։ Հնարավոր է՝ երկրորդ, երրորդ անգամ կանչել, բացառում չեմ անում, ամեն մի հրավիրյալից հետո հարցեր կարող են առաջանալ, որի արդյունքում մենք կարող ենք նորից մարդկանց հրավիրել պարզաբանումներ ստանալու։ Օրինակ՝ քառօրյայի դրվագով երկրորդ անգամ Արշակ Կարապետյանին կանչեցինք»,- ասաց նա։
Անդրանիկ Քոչարյանի խոսքով՝ հանձնաժողովում Օնիկ Գասպարյանի ասածները որեւէ հակասություն չունեն Նիկոլ Փաշինյանի այսօրվա հայտարարության հետ։
