Հայաստանի պաշտպանության նախարար Սուրեն Պապիկյանը երկրորդ անգամ աշխատանքային այցով գտնվում է Փարիզում։ Անցյալ տարի՝ սեպտեմբերյան ագրեսիայից հետո սեպտեմբերի 28-ին տեղի ունեցավ Հայաստանի և Ֆրանսիայի պաշտպանական գերատեսչությունների ղեկավարների առաջին հանդիպումը։
Այդ օրը պաշտպանության նախարարի այցն ու հանդիպումը փաստացի տեղի էր ունեցել վարչապետ Նիկոլ Փաշինյանի և Ֆրանսիայի նախագահ Էմանուել Մակրոնի հանդիպմանը զուգահեռ:
Վերջին օրերի սահմանային տարբեր հատվածներում լարումների ֆոնին Հայաստանի պաշտպանական գերատեսչության ղեկավարի այցը ևս կարծես տեղի է ունենում ընթացիկ անհրաժեշտության տրամաբանությամբ։
Առանցքային հետաքրքրության առարկա է թերևս այն, թե արդյո՞ք օրակարգում կլինի Հայաստանին սպառազինության վաճառքի հարց՝ հաշվի առնելով նաև այն հանգամանքը, որ Երևանի հիմնական ռազմա-տեխնիկական գործընկեր Ռուսաստանը չի հասցնում անգամ սեփական ուկրաինական կարիքները բավարարելը:
Պետք է հաշվի առնել, սակայն, որ երբ խոսվում է արևմտյան սպառազինության ձեռքբերման մասին, կան ոչ միայն քաղաքական խնդիրներ, այլ հենց բուն ռազմա-տեխնիկական: Այսինքն՝ թե մոտ երեք տասնամյակ գերազանցապես խորհրդային-ռուսական սպառազինական տեխնոլոգիական «հարթակի» վրա գտնվող հայկական զինուժը ի՞նչ ծավալով ու արագությամբ կարող է յուրացնել արևմտյան սպառազինությունը, եթե իհարկե կա այդպիսին ձեռք բերելու առարկայական խոսակցություն և ոչ թե ընդամենը ենթադրություն է, որ կարող ենք անել պաշտպանության նախարարների հանդիպումից:
Բոլոր դեպքերում, Հայաստանի շփումները եվրաատլանտյան բլոկի ռազմական գերատեսչությունների ղեկավարների հետ կարևոր են թե ընթացիկ խնդիրների լուծումներ փնտրելու, թե Հայաստանի համար ռազմավարական խնդրի՝ պաշտպանական ռեֆորմի հարցում գործընկերային հնարավորինս լայն ներուժ ձևավորելու և իրացնելու տեսանկյունից: