Երեկ Ռուսաստանի նախագահ Դմիտրի Մեդվեդևը հարցազրույց է տվել Euronews հեռուստաալիքին, որտեղ խոսել է Ռուսաստանի և Ուկրաինայի միջև գազային վեճերի մասին, ինչպես նաև անդրադարձել է Սիրիայի հարցին և արևմտյան երկրների կողմից այդ երկրի նկատմամբ միջազգային խիստ պատժամիջոցների կիրառման հնարավորությանը:
«Գիտեք, ես հույս ունեմ, որ, ի վերջո, անցած տարիների փորձը մեր մոտ գործընկերներին և ընկերներին պետք է սովորեցնի, որ չի կարելի պայթեցնել գործող պայմանագրային հիմքը, նույնիսկ եթե դա նրանց դուր չի գալիս»,- ասել է Մեդվեդևը` պատասխանելով այն հարցին, թե արդյոք Ուկրաինայի հետ գազային վեճը կարո՞ղ է խնդիրներ ստեղծել Եվրոպայի համար: Մեդվեդևն այդպես էլ հստակ չի պատասխանել գազային վեճերի ապագայի մասին հարցին, և թե որքանով դա կանդրադառնա Եվրոպայի վրա: «Երբ մեր գործընկերները` Ուկրաինայի նախագահն ու վարչապետն ասում են` այս պայմանագիրն անարդարացի է, այն լավը չէ, այն կարծես խաբեություն է, և մենք այն չենք կատարելու, լսե՛ք, դա արդեն անցնում է բոլոր սահմանները»,- վրդովվել է Մեդվեդևն` ասելով, որ բոլոր պայմանագրերը գործում են այնքան, քանի դեռ դրանք չեն դադարեցվել դատարանի կողմից: Տեքստն ամբողջությամբ հրապարակված է Կրեմլի կայքում:
Լրագրողը խնդրել է Մեդվեդևին մեկնաբանել վերջերս Ֆրանսիայի արտաքին գործերի նախարարի այն կոչը, որով վերջինս առաջարկում էր Ռուսաստանին աջակցել Եվրամիությանը Սիրիայի դեմ պատժամիջոցների հարցում: Մեդվեդևն ասել է, որ իրոք այդ թեման քննարկել է Ալեն Ժյուպեի հետ` նշելով, որ չէր ցանկանա, որպեսզի լիբիական դեպքերը կրկնվեն Սիրիայում: «Այո, մենք խնդիրներ ենք տեսնում Սիրիայում, մենք տեսնում ենք նաև ուժի ոչ համաչափ կիրառում և մեծաթիվ զոհեր: Դա մեզ էլ ձեռք չի տալիս: Ես մեկ անգամ չէ, որ ասել եմ դրա մասին նախագահ Բաշար Ալ-Ասադի հետ զրույցի ժամանակ: Սակայն կարծում եմ, որ բանաձևերը, որոնք մենք ընդունում ենք, ինչպես ընդունված է ասել՝ Սիրիայի իշխանություններին «մեսիջ» ուղարկելու համար, պետք է ուղղված լինեն երկու կողմերին, քանի որ այնտեղ իրավիճակը միանշանակ չէ»,- ասել է Մեդվեդևը` հավելելով, որ հակակառավարական ցույցերի մասնակիցները միայն եվրոպական ժողովրդավարության կողմնակիցներ չեն, այլ նրանց մեջ կան նաև ահաբեկիչ ծայրահեղականներ:
«Այդ պատճառով պետք չէ իդեալականացնել իրավիճակը, այլ պետք է առաջնորդվել ուժերի հավասարակշռությունից և շահերից ելնելով: Մենք պատրաստ ենք պաշտպանել տարբեր մոտեցումներ, սակայն դրանք չպետք է քննարկվեն կառավարության և նախագահ Ալ-Ասադի միակողմանի քննադատության տեսանկյունից»,- հավելել է Մեդվեդևը:
