ԱՄՆ նախագահ Բարաք Օբաման Կոնգրեսին ուղղված իր ելույթում առաջարկել է 447 մլրդ դոլար հատկացնել կառավարությանը` աշխատատեղեր ստեղծելու համար: Այս մասին հաղորդում է CNN հեռուստաալիքը: Մենք երեկ տեղեկացրել էինք, որ Սպիտակ տան աղբյուրները խոսում էին 300 մլրդ-ի մասին: Արդեն այս թվի դեպքում փորձագետները մտահոգություն էին հայտնել` ասելով, որ նման միջոցները ավելի կվատացնեն իրավիճակը բյուջետային ծախսերի առումով: Սակայն այսօր Օբաման էլ ավելի բարձրացրեց այդ շեմը:
Օբաման առաջարկել է 49 մլրդ հատկացնել ԱՄՆ քաղաքացիներին գործազրկությունից ապահովագրելուն, 30 մլրդ` կրթության բարեփոխմանը և 50 մլրդ` տրանսպորտային ենթակառուցվածքների արդիականացմանը: Օբամայի ելույթը բազմաթիվ անգամ ընդմիջվել է բուռն ծափահարություններով, սակայն ակնհայտ է եղել, որ հանրապետականները դժգոհ են այս առաջարկներից: Նրանք հազվադեպ են ծափահարել և չեն կանգնել ծափահարությունների ժամանակ: