Իրանի բարձրագույն խորհրդի ազատ առևտրաարդյունաբերական և հատուկ տնտեսական գոտիների քարտուղարության ֆինանսական կազմակերպությունների հետ աշխատանքների համակարգման բաժնի ղեկավար Զոհրե Բահրեբարը հայտարարել է, որ Իրանն ու Հայաստանը համատեղ կստեղծեն «Արաքս-Մեղրի» ազատ տնտեսական գոտի:
«Ազատ առևտրաարդյունաբերական ու հատուկ տնտեսական գոտիների բարձրագույն խորհրդի քարտուղարության օրակարգում Իրանի և թիրախային երկրների միջև համատեղ ազատ գոտիների ստեղծումն է»,- ասել է նա։
Իրանահայ մեկնաբան Սահակ Շահմուրադյանը «Առաջին լրատվական»-ի հետ զրույցում նշեց. «Իրանում երկար ժամանակ դա տնտեսական քաղաքականության առանցքն է կազմում՝ նկատի ունենալով, որ Իրանի իշխանությունները ուղղվել են դեպի Ռուսաստան և Չինաստան՝ իրենք տնտեսական քաղաքականությունը կառուցում են այս երկու երկրների հետ հարաբերությունները խորացնելով: Կարող ենք գնահատել, որ Իրանը փորձում է իր տնտեսական և առևտրային հարաբերությունները խորացնել ԵԱՏՄ-ի հետ։ Քանի որ Հայաստանն այդ միությունում առանցքային դեր ունի, Իրանը Հայաստանին դիտում է որպես միջոց ԵԱՏՄ շուկաներում իր ազդեցության գոտին տարածելու համար: Այսինքն՝ սա նորություն չէ, Իրանը արդեն երկար ժամանակ է, որ հայտարարում է, որ ցանկանում է ԵԱՏՄ-ի հետ իր կապերն ընդլայնել: Իրանը փորձում է Հայաստանի միջոցով իր կապը հաստատել Ռուսաստանի և ԵԱՏՄ երկրների հետ: Սա կարող է կենսունակ ուղղություն լինել Իրանի համար»:
Շահմուրադյանի խոսքով՝ այստեղ համընկնում են Իրանի, Հայաստանի և Ռուսաստանի շահերը. «Վերջերս Իրանը Ռուսաստանի հետ մեծ տրանսպորտային երկաթուղու՝ Ռաշտ-Աստարա երկաթգծի մասին պայմանագիր են կնքել: Իսկ հայաստանին դիտում են որպես երկրորդ տարբերակ, որը կարող է Իրանին կապել ԵԱՏՄ գոտու երկրների, հիմնականում Ռուսաստանի հետ: Իրանը փորձում է Արևմուտքի պատժամիջոցները շրջանցելու նպատակով ելք ունենալ դեպի Ռուսաստանի շուկաներ և այստեղ շահերը փոխադարձ են: Ռուսաստանն էլ փորձում է Իրանի տարածքով դեպի Հնդկաստան և Չինաստան ճանապարհ բացել՝ շրջանցելով Արևմուտքի կողմից շրջափակումները ՌԴ-ի դեմ»,-ասաց մեկնաբանը:
Հարցին, թե արդյոք Ռաշտ-Աստարա երկաթուղու նախագիծը չի նշանակում, որ Իրան-ՌԴ հարաբերություններում առաջին պլանում Ադրբեջանն է, նա պատասխանեց. «Դա շատ կարևոր նախագիծ է: Մենք պետք է նկատի ունենանք, որ այդ երկաթգծի մի հատվածն անցնելու է Ադրբեջանի տարածքով, բայց պաշտոնական հայտարարություններում Ադրբեջանի անունը չեն տվել, միայն նշվել է, որ երկաթգիծը կառուցվելու է Ռուսաստանի օգնությամբ: Իրականում, այո, մի հատվածը անցնելու է Ադրբեջանի տարածքով՝ միանալով Ադրբեջանի կասպիական նավահանգիստներին, և մեկ ճյուղն էլ անցնելու է դեպի Ռուսաստան, մի ճյուղն էլ Ադրբեջանով անցնելու է դեպի Վրաստան և Սև ծով: Ադրբեջանը, այո, կարևոր է Իրանի համար, բայց այդ մասին լռել են, երևի հայաստանին չանհանգստացնելու համար, կամ Հայաստանին դիտելով որպես երկրորդ այլընտրանքային տարբերակ: Ցամաքային ճանապարհը Հայաստանով է անցնելու և Իրանը չի հրաժարվում Հյուսիս-Հարավ ճանապարհից»:
