Չենք գնում լուծումների, անընդհատ սպասում ենք, որ այս շաբաթ-կիրակին անցնի մի դուռ կբացվի, բայց չի բացվելու ոչ մի դուռ, մենք պետքէ դուռ բացենք, իսկ դուռ բացելու համար պետք է կատարենք ֆիզիկական, սոցիալ-հոգեբանական, քաղաքագիտական, դիվանագիտական ծանր աշխատանք, մայիսի 22-ի ասուլիսում հայտարարել է վարչապետ Նիկոլ Փաշինյանը, երբ լրագրողներից մեկը ներկայացրել է օրերս ԱՄՆ Միջազգային հանրապետական ինստիտուտի իրականացրած սոցհարցման տվյալը, ըստ որի Նիկոլ Փաշինյանի վարկանիշը մոտ 14 տոկոս է, իսկ ՔՊ-ին ձայն կտա մոտ 21 տոկոս քաղաքացի:
Հարցը հնչել է, թե ի՞նչն այն չի անում քաղաքական ղեկավարությունը: Եվ ահա, այդ հարցին ի պատասխան Նիկոլ Փաշինյանը նշել է, որ չեն գնում լուծումների, սպասում են, որ ինչ որ դուռ կբացվի, մինչդեռ դուռ պետք է բացեն իրենց ծանր ու հետևողական, բազմապրոֆիլ աշխատանքով: Այլ կերպ ասած, Նիկոլ Փաշինյանը ի պատասխան ցածր վարկանիշի վերաբերյալ հարցի, ոչ թե կասկածի տակ է դրել վարկանիշային տվյալների ճշգրտությունը, այլ փաստացի ընդունել է դրանք, նշելով, որ բավարար չէ, ցածր է աշխատանքային էֆեկտիվությունը: Ընդ որում, գուցե առաջին անգամ Նիկոլ Փաշինյանը դրա համար պատասխանատվությունը դնում է փաստորեն հենց քաղաքական ղեկավարության վրա, համենայն դեպս չասելով, որ խոչընդոտում է «համակարգային դիմադրությունը» կամ «հակահեղափոխությունը»: Իհարկե հնարավոր է, որ սա ընդամենը դրվագ է, իսկ հաջորդիվ դարձյալ առաջին պլան կգան քարոզչական այդ նարատիվները, ինչը սակայն դրանով իսկ կհաստատի վարչապետի ինչ-որ իմաստով անակնկալ անկեղծ պատասխանը՝ որ վարկանիշի ցածր լինելը ցածր աշխատանքային էֆեկտիվության հետևանք է:
«Մեզ թվում ա, որ մենք մեզ հետ խոսելիս, աշխարհի հետ խոսելիս մենք մեր ասելիքը ասենք, դրանով ամեն ինչ լուծվում ա: Մենք պետք է ուրիշների ասելիքն էլ լսենք», հայտարարում է Նիկոլ Փաշինյանը: Ըստ էության, այստեղ կան ուշագրավ տողատակեր, որոնց անդրադարձի առիթներ թերևս կլինեն:
Ընդհանուր առմամբ, Նիկոլ Փաշինյանը գործնականում, հնարավոր է անուղղակի, սակայն բավականին թափանցիկ կերպով ակնարկում է կառավարող քաղաքական մեծամասնոթյան ոչ բավարար էֆեկտիվության մասին: Մեծ հաշվով, Փաշինյանի արձագանքը գործնականում արտացոլում է թերևս այն խնդիրը, ինչին անդրադառնալու առիթ եմ ունեցել շաբաթներ առաջ, ներքաղաքական և ներիշխանական իրողությունների առիթով մի անդրադարձի շրջանակում: Մասնավորապես, վարչապետ Փաշինյանի համար ավելի ու ավելի արդիական է դառնում քաղաքական թիմի էական վերանայման խնդիրը՝ նվազագույնը հերթական նախընտրական շրջափուլին ընդառաջ, որը խորքային առումով ամենևին սարերի հետևում չէ, քանի որ արդեն լրանում է ընտրական հնգամյա ցիկլի երկրորդ տարին և փաստացի ցիկլը «հատում է հասարակածը» և ավելի շուտ հայտնվում արդեն նոր ընտրության տրամաբանության ներքո:
