Ադրբեջանական Salam News գործակալության փոխանցմամբ՝ «Ադրբեջանի միացյալ ժողովրդական ճակատ» կուսակցությունն ադրբեջանական իշխանություններին կոչ է արել հրաժարվել ղարաբաղյան հակամարտության կարգավորման բանակցային գործընթացից։
Նշվում է, որ կուսակցության վերջին նիստում քննարկվել է երկրի հասարակական-քաղաքական իրավիճակը, Լեռնային Ղարաբաղի հակամարտության շուրջ տիրող իրավիճակը և հատկապես Դուշանբեում տեղի ունեցած ԱՊՀ-ի գագաթնաժողովում Հայաստանի նախագահ Սերժ Սարգսյանի վերջին ելույթը։
Կուսակցության տարածած հայտարարության մեջ նշված է. «Տարածաշրջանում գերակա դիրքեր ունեցող Ադրբեջանը չպետք է հաշտվի ստեղծված իրավիճակի հետ և պարտավոր է քայլեր ձեռնարկել դա փոփոխելու համար։ Տաջիկստանում տեղի ունեցած ԱՊՀ գագաթնաժողովում Հայաստանի նախագահ Սերժ Սարգսյանի հնչեցրած հայտարարությունից հետո, որում նա ասում է, թե Լեռնային Ղարաբաղը երբեք չի հրաժարվի անկախությունից, Ադրբեջանը պետք է միջնորդներին ու միջազգային հանրությանն իրազեկի, որ դադարեցնում է բանակցային գործընթացը։
Սերժ Սարգսյանի հետ բանակցությունների շարունակումը կծառայի միայն գոյություն ունեցող ստատուս-քվոյի պահպանմանը։ Իշխանությունները չպետք է անհանգստանան այդ կապակցությամբ հնարավոր արտաքին ճնշումներից և պետք է քայլեր ձեռնարկեն՝ աշխարհին ապացուցելու համար, որ «անհրաժեշտ է օկուպացիայից մեր տարածքների ազատագրումը»։ Միայն միասնության ու վճռականության շնորհիվ մենք կարող ենք «ազատագրել մեր հողերը»։ Մեր փոխարեն ոչ ոք չի «ազատագրի» դրանք»։
