ԱՄՆ պաշտպանության նախարար Լեոն Պանետտան, մասնակցելով PBS հեռուստաալիքի հաղորդումներից մեկին, մի շարք կարևոր հայտարարություններ է արել: Պանետտան ասել է, որ ԱՄՆ-ն բախվում է «անթիվ մարտահրավերների հետ», որոնց թվում է «ահաբեկչության չդադարող վտանգը»: Այս համատեքստում նա անդրադարձել է պատերազմներին, որ ԱՄՆ-ն վարում է Աֆղանստանում և Իրաքում, ինչպես նաև ՆԱՏՕ-ի գործողություններին Լիբիայում:
«Մենք բախվում ենք Իրանից և Հյուսիսային Կորեայից եկող վտանգներին: Մենք ապրում ենք մի աշխարհում, որտեղ կիբերանվտանգությունը արդեն մտահոգություններ է առաջացնում համացանցային հարձակումների տեսակետից»,- ասել է պաշտպանության նախարարը: «Մենք նաև ապրում ենք մի աշխարհում, որտեղ կան տերություններ, որոնք վերելք են ապրում: Այնպիսի երկրներ, ինչպիսիք են Չինաստանը, Բրազիլիան և Հնդկաստանը, էլ չեմ խոսում, իհարկե, Ռուսաստանից, որոնք իրենցից մարտահրավեր են ներկայացնում ոչ միայն այն առումով, որ փորձում ենք համագործակցել նրանց հետ, այլև այն՝ որ պիտի հոգ տանենք, որպեսզի նրանք չխաթարեն աշխարհի կայունությունը»,- ասել է Պենտագոնի ղեկավարը:
