Այն իրավիճակն է, երբ հասարակությունը ստեղծում է խնդիրը և ձեռնամուխ է լինում պայքարելու «դեմ» կամ «ի պաշտպանություն», թերևս մեծ ջանքերով: Այսպես հայ հասարակությունն ապրում է որոշակի բարոյաէթիկական նորմերով, որոնց «ոտնահարումը» համարում է պիղծ և ազգադավ: Այսօր այդ նորմերի «պաշտպանների» դեմ նույն հասարակությունը ըմբոստանում է: «Առաջին լրատվականի» հետ զրույցում, մեկնաբանելով սոցցանցերում ընթացող բուռն քննարկումները` կապված դերասանուհի Անժելա Սարգսյանի անվան շուրջ, ասաց Ռազմավարական և ազգային հետազոտությունների հայկական կենտրոնի փորձագետ, հոգեբան Արմինե Ղազարյանը:
Նրա խոսքով, դա պարադոքս է, որը հնարավոր է բացատրել թերևս հասարակական շերտերի տարբերությամբ: Ստեղծվել է արհեստական, շինծու իրավիճակ, որում, սակայն, կան «զոհեր»: «Խնդիրը հասարակության մեջ գոյություն ունեցող «խառնիճաղանջ» արժեքային համակարգն է, որտեղ աձն այդ արժեքային համակարգում կորցրել է իրեն, կորցրել իր անձնային հավասարակշռությունն ու առանցքը, մարդասիրությունը, կինը կորցրել է իր կանացիությունը և կանացի համերաշխությունը, տղամարդը` իր տղամարդկային ինքնահաստատվածությունը»,- նշեց հոգեբանը` ուշադրություն հրավիրելով այն հանգամանքի վրա, թե ինչ է կատարվում` համացանցում հայտնվում են մի դերասանուհու ինտիմ կյանքի նկարներ, հաջորդում է մեծ աղմուկ` ազդեցության ուժին, կարելի է ասել, անհամապատասխան, և բացահայտվում են մարդիկ, «մերկանում» են անձինք՝ ոչ թե ֆիզիկապես, այլ էությամբ: Հասարակությունը «պահանջում» է, «տանում» է այդ անձանց «մերկացմանը»: Զոհը դառնում է մեղադրյալ, «գործընկերները»` մեղադրող, մեղադրողը չի կրում հասարակական հավանություն, չի ներկայացնում հասարակությանը, ինչպես իրեն թվացել էր:
Այդ ամենից, ըստ Ա.Ղազարյանի, կարելի է եզրակացնել, որ գործ ունենք կեղծ արժեքային համակարգի, կեղծ բարոյականության հետ: Ապացույցը, ըստ նրա, հետևյալն է, որ այն գործընկերները, որոնք քննադատում են դերասանուհուն նկարների բովանդակության համար, իրենք իսկ նկարահանում են մի սերիալ, խաղում են ցածրորակ սերիալում, որն իր հասարակական ազդեցությամբ «անդաստիարակ» է, և կա քարոզվող անբարոյականություն: Բացի այդ` հարցազրույց են տալիս վատ հայերենով և բավական ագրեսիվ, չարությամբ, առանց կանացի համերաշխության, և այդ «մերկացված» անձինք ֆիլմում բարու հաղթանակն են տոնելու, իրենց խոհեմությունն է հաղթելու, նրբազգացության օրինակ են և այլն:
«Կեղծ բարոյական չափանիշներով անձի գնահատանքը արդեն իսկ սուբյեկտիվ է. մարդու անձնական կյանքը վերաբերում է միմիայն իրեն և իր ընտանիքին, և զավեշտ է` «հասուն», իբրև թե հաստատված, «ինտելիգենտ» դերասանների կողմից ուրիշի ինտիմ կյանքի մանրամասները` որպես գլխավոր թեմա շահարկելը»,- ընդգծեց նա:
Անդրադառնալով հասարակության արձագանքին` նա նկատեց, որ այն միանշանակ չէ, բայց նաև բավական բուռն է: Արձագանքներից երբեմն կարող ենք տեսնել, թե որքան մոտ են մեր լավն ու վատը, «անհնարինն» ու «հնարավորը», որքան լղոզված են մեր «հին» և «նոր», «հայկական» և «ոչ հայկական» անվանվող բարոյականության սկզբունքները, այս ամենով հանդերձ՝ քննարկում-քննադատությունները նույն անիվի մեջ են պտտվում, քանզի արժեքային համակարգի առանցքն է կորսված, և կեղծ արժեքներն իրենց սոցիալական գործառույթը չեն կատարում:
Լուսանկարը` IQ Magazine-ի
