Ես համաձայն չեմ, որ Էրդողանը մայիսի 14-ին Թուրքիայում կայանալիք ընտրություններում շանսեր չունի, շատ լավ էլ ունի շանսեր: Այս մասին «Առաջին լրատվական»-ի հետ զրույցում նշեց թուրքագետ Ռուբեն Սաֆրաստյանը:
«Նրա շանսերը ես չէի ասի, որ ավելի քիչ են, քան ընդդիմությանը: Դեռ նախընտրական պայքարը չի մտել վերջնական փուլ, դեռ նախնական փուլն է և հրապարակվող տվյալները չեն համապատասխանում իրականությանը, քանի որ այդ կենտրոնները, որոնք իրականացնում են հարցումները, քաղաքականապես կապված են կամ իշխանության հետ, կամ ընդդիմության: Նույն Էրդողանը վերջերս հրապարակեց տվյալներ, ըստ որոնց ինքը շատ մեծ առավելությամբ հաղթում է:
Երկրորդը, մի կարևոր հանգամանք կա Թուրքիայում կապված ընտրությունների հետ, դա Էրդողանի անձն է, որպես քաղաքական գործիչ, խարիզմատիկ գործիչ: Կան հետազոտություններ, որոնք ցույց են տալիս, որ Թուրքիայում ընտրողների մոտ 20-25 տոկոսը ամեն դեպքում ձայն է տալու Էրդողանին: Սա մեծ ռեսուրս է իր համար: Եթե դրան ավելացվի այն հանգամանքը, որ նա շատ ճարպիկ և խորամանկ գործիչ է, կարողանում է ընդդիմության թուլություններն օգտագործել, կարող ենք ասել, որ արդյունքները շատ հեռու են կանխատեսելի լինելուց»: