Ռուսական Regnum լրատվական գործակալության փոխանցմամբ՝ Ադրբեջանի նախագահի աշխատակազմի հասարակական-քաղաքական հարցերի վարչության պետ Ալի Հասանովը լրագրողներին հայտարարել է, որ Հայաստանի «ապակառուցողական դիրքորոշման պատճառով» ձգձգվում է ղարաբաղյան հակամարտության կարգավորումը.
«Ղարաբաղյան հակամարտության կարգավորման գործընթացում Հայաստանի նոր նախաձեռնությունները ո՛չ դրական, ո՛չ էլ բացասական ազդեցություն են թողնում գործընթացի վրա։ Գոյություն ունի հակամարտության կարգավորման պարզ բանաձև՝ դա միջազգային իրավական նորմերի պահպանումն է։
«Պետք է» վերականգնվեն Ադրբեջանի տարածքային ամբողջականությունն ու Լեռնային Ղարաբաղի ողջ բնակչության քաղաքացիական իրավունքները։ Արդեն բազում տարիներ խոսվում է այս միջազգային նորմերի մասին։ Հայկական կողմի «կամազուրկ» լինելը կամ օտար կամքից «կախված լինելը», նրա «ապակառուցողական» դիրքորոշումը կամ էլ «ապակառուցողականության» հանդեպ նրա հակվածությունը հանգեցնում են բանակցային գործընթացի ձգձգման։
Բանակցությունները շարունակելու Ադրբեջանի պոտենցիալը դեռ սպառված չէ։ Վաղ թե ուշ այս խնդիրը կստանա իր լուծումը։ Ադրբեջանական տարածքները չեն կարող մշտապես գտնվել «օկուպացիայի» տակ։ Լեռնային Ղարաբաղում «պետք է» վերականգնվի Ադրբեջանի տարածքային ամբողջականությունը։ Հակառակ դեպքում Ադրբեջանը երկար ժամանակ չի տանի ստատուս-քվոն»։
