Այսօր Հայաստանի ԱԳՆ-ում ՀՀ ԱԳ նախարար Էդվարդ Նալբանդյանի և Հարավային Կովկասի, Վրաստանի ճգնաժամի հարցերով ԵՄ հատուկ նորանշանակ ներկայացուցիչ Ֆիլիպ Լեֆորի հանդիպման ավարտին տեղի ունեցած համատեղ մամլո ասուլիսում Է.Նալբանդյանը անդրադարձավ ՄԱԿ-ի Անվտանգության խորհրդի մշտական անդամ դառնալու Ադրբեջանի հավակնություններին:
Է. Նալբանդյանը նշեց, որ ՄԱԿ-ի Անվտանգության խորհրդի գլխավոր խնդիրը և նպատակը խաղաղության պահպանումն ու հաստատումն է. «Հարցեր են ծագում, որ մի երկիր, որը իր `ռազմատենչ քաղաքականությամբ, իր` պատերազմի քարոզչությամբ, մի երկիր որ պարծենում է, որ վեց տարում քսան անգամ ավելացրել է իր ռազմական բյուջեն, մի երկիրը, որը ուժի կիրառման սպառնալիքը դարձրել է իր քաղաքականության կարևոր մաս, փաստորեն սպառնում է հենց խաղաղությանը և կարող է հավակնել ՄԱԿ-ի Անվտանգության խորհրդի մշատական անդամ դառնալ: Այլ հարցեր են ծագում` օրինակ Ադրբեջանը որը բանակցություններ է վարում ԵՄ-ի հետ` Ասոցացված պայմանագիր կնքելու վերաբերյալ, դեմ է դուրս եկել ԵՄ անդամ երկու երկրների` Հունգարիային և Սլովենիային, ասելով, որ ԵՄ երկու անդամները չեն կարող ավելի լավ կատարել այն, ինչ Ադրբեջանը կարող է կատարել: Հարցեր շատ կարող են ծագել այս ուղղությամբ, բայց արդեն որոշ երկրների պատասխանատվության հարցն է` արդյո՞ք իրենք իրենց ձայնը կտան Ադրբեջանին, թե՝ ոչ, բայց մեկ բան հստակ է, որ Անվտանգության խորհրդի հեղինակությանը սա որևէ բան չի ավելացնի, այլ հակառակը՝ ես կարծում եմ»:
