Newsru.co.il-ի փոխանցմամբ՝ թուրքական իշխանությունները քաղաքական նոր ռազմավարության շրջանակներում հայտարարել են Միջերկրական ծովի արևելյան հատվածում սեփական ռազմածովային ուժերի ընդլայնման մասին։
Թուրքական նոր պլանը ստացել է «Բարբարոսա» անվանումը։ Սակայն, ի տարբերություն կայսր Ֆրիդրիխ Բարբարոսայի պատվին անվանված՝ Խորհրդային միության վրա հարձակման նացիստական պլանի, թուրքական նոր պլանն անվանվել է թուրք ծովակալ Հայրեդդին Բարբարոսայի պատվին, որը 16-րդ դարում գլխավորել է Միջերկրական ծովի խոշորագույն ծովահենային նավատորմը։
Այս նպատակով Սև և Մարմարա ծովերում տեղակայված մի շարք ռազմանավեր բերվելու են Միջերկրական և Էգեյան ծովեր։ Խոսքը երկուական հակասուզանավային ֆրեգատների և հրթիռային կորվետների, ինչպես նաև օժանդակ նավերի մասին է։
Միջերկրական ծովի արևելյան հատվածում (Իսրայելի և Կիպրոսի սահմաններին) թուրքական ռազմածովային ուժերի ակտիվանալու մասին արդեն իսկ ազդարարել են Թուրքիայի վարչապետ Էրդողանն ու արտգործնախարար Ահմեդ Դավութօղլուն։ Իսկ ԵՄ-ին Թուրքիայի անդամակցության գծով պետնախարար Էգեմեն Բաղըշը սպառնացել է Կիպրոսին Միջերկրական ծովի արևելյան հատվածում նավթի ու գազի որոնողական աշխատանքներ իրականացնելու կապակցությամբ։
Թուրքիան չի ճանաչում Իսրայելի և Լիբանանի հետ Կիպրոսի կնքած համաձայնագրերը, որոնք առնչվում են բացառապես տնտեսական գոտու սահմանների հստակեցմանը։ Թուրքիան վստահեցնում է, որ դրանով խախտվում են ինքնահռչակ Հյուսիսային Կիպրոսի թուրքական հանրապետության իրավունքները։
Թուրքական այս սպառնալիքները զայրույթ են առաջացրել Աթենքում, և Հունաստանի կառավարությունը հանդես է եկել Կիպրոսին հասցեագրված թուրքական սպառնալիքների քննադատությամբ։
