Երեկ ռուս խաղաղապահները փորձել են Հայաստանի Գորիս քաղաքից Արցախ տեղափոխել 27 քաղաքացիների, ներառյալ՝ երեխաներ, կանայք ու տարեցներ, սակայն Գորիս-Ստեփանակերտ մայրուղու արգելափակված հատվածում ադրբեջանցի «էկոակտիվիստները» արգելել են տրանսպորտային միջոցների երթևեկությունը։
Տեղում ադրբեջանցիների միջամտության պատճառով վատացել է չորս կանանց ինքնազգացողությունը, ռուս խաղաղապահներն ապահովել են շտապ օգնության մեքենայի ժամանումը, և չորս քաղաքացիները տեղափոխվել են Ստեփանակերտի Հանրապետական բժշկական կենտրոն: Բոլորին ցուցաբերվել է պատշաճ առաջին օգնություն, և նրանք գտնվում են բժիշկների հսկողության տակ։ Կանանց կյանքին վտանգ չի սպառնում:
«Հելսինկյան նախաձեռնություն-92» Լեռնային Ղարաբաղի կոմիտեի համակարգող, խաղաղության և մարդու իրավունքների միջազգային մրցանակների դափնեկիր Կարեն Օհանջանյանը կարծում է, որ իրավիճակը զարգանում է լարվածության սրման ուղղությամբ.«Ադրբեջանը փորձում է առավելագույնս օգտագործել այն իրավիճակը, որում հայտնվել է Ռուսաստանը Ուկրաինայում, ինչը, անշուշտ, չի կարող չազդել Լեռնային Ղարաբաղի հակամարտության գոտում տեղակայված ռուսական խաղաղապահ զորախմբի կողմից իրենց պարտականությունների կատարման որակի վրա»,-«Առաջին լրատվական»-ի հետ զրույցում ասաց նա։
Կատարվածն, ըստ մեր զրուցակցի, ոչ այլ ինչ է, քան 2020 թվականի նոյեմբերի 9-10-ի համաձայնագրի դրույթների հերթական խախտում, որը խաղաղապահ կոնտինգենտին պարտադրում է Լաչինի միջանցքով ղարաբաղցիների անխոչընդոտ տեղաշարժն ապահովելու գործառույթները.«Շտապ օգնության ծառայության կողմից Ստեփանակերտի հոսպիտալ կանանց տեղափոխումը ռուսական զորամիավորման բացարձակ անզորության օրինակ էր, քանի որ ինքը կարող էր վիրավոր քաղաքացիներին հասցնել իր ռազմաբժշկական ծառայության կառքով։ Այս ամենը պահանջում է անհապաղ արձագանք ինչպես Հայաստանի, այնպես էլ Ղարաբաղի իշխանությունների կողմից»։
Օհանջանյանի խոսքերով՝ Հայաստանի և Արցախի ղեկավարությունը պետք է անհապաղ դիմի միջազգային հանրությանը՝ ապահովելու Արցախի քաղաքացիների անվտանգությունը՝ հակամարտության գոտի մտցնելով միջազգային ռազմական և քաղաքացիական փորձագետներից բաղկացած հատուկ դիտորդական խմբեր.«Բացի այդ, Արցախի նախագահը և Արցախի խորհրդարանը պետք է անհապաղ դիմեն բոլոր միջազգային միջկառավարական կառույցներին, որոնք կենտրոնացած են մարդու իրավունքների հարգման վրա՝ կոչ անելով քաղաքական ապաստան տրամադրել Արցախի բոլոր քաղաքացիներին և ապահովել նրանց անարգել արտագաղթը իրենց հայրենիքից՝ միաժամանակ իրենց որոշումներով պարտավորեցնելով Ադրբեջանին հարգելու Արցախի ժողովրդի ինքնորոշման իրավունքն իր պատմական հայրենիքում և Արցախի ողջ ժողովրդի ապագա վերադարձը»։
Խորհրդարանի և նախագահի գործողությունները պետք է լինեն հստակ և անառարկելի, որպեսզի Ռուսաստանն ու Ադրբեջանը, Հայաստանը գիտակցեն իրենց շահերին ուղղված սպառնալիքները միջազգային հանրությանն ուղղված նման կոչից։ Մեր ժողովրդի համբերության բաժակը լցվել է։ Մենք ժամանակին նույն կերպ կասեցրինք Կրեմլի և Բաքվի հրեշավոր ծրագիրը, որը կրում էր «Կոլցո» ծածկանունը։ Այս գաղափարի հեղինակը ես եմ եղել, և այն իրականացրել է ԼՂԻՄ-ի մարզի գործկոմը իր որոշմամբ։ Այս քայլը միանգամից կանգնեցրեց Արցախը հայերից մաքրելու ԽՍՀՄ-ի աննախադեպ ցանկությունը։ Եկել է ժամանակը, որ մենք այսօր դիմենք այս մեխանիզմին»,-եզրափակեց նա։
