ԱԺ պաշտպանության և անվտանգության հանձնաժողովն ամենօրյա, անգամ ամենժամյա կապի մեջ է ՊՆ-ի, ԱԱԾ-ի հետ. մեր լիազորությունների սահմաններում տեղեկացվում ենք տեղի ունեցողից և նաև ինչ-որ կարող ենք, ինչով պետք է, փորձում ենք հնարավորինս նպաստել: Այս մասին «Առաջին լրատվական»-ի հետ զրույցում նշեց ԱԺ «Քաղաքացիական պայմանագիր» խմբակցության պատգամավոր Վահագն Ալեքսանյանը՝ անդրադառնալով Տեղ-Կոռնիձոր հատվածում առկա իրավիճակին:
Դիտարկմանը, որ իշխանությունների բացթողումների արդյունքում է, որ ունենք այս իրավիճակը, նա արձագանքեց. «Թույլ տվեք այդ մեղադրանքներին չանդրադառնալ, քանի որ դա ծեծված, միակողմանի մեղադրանքների շարք է, որին անդրադառնալ չարժի: Շատ հստակ սինխրոնացված գործողություններ կան Ադրբեջանի զինված ուժերի և այստեղի մի խմբակի գործողություններում»:
Ինչ վերաբերում է նրան, որ Տեղ համայնքի բնակիչները ևս տարակուսած են, քանի որ իրենց հողատարածքների մի մասն անցել է ադրբեջանցիներին, Վահագն Ալեքսանյանն ասաց. «Պետք է սպասել ԱԱԾ հայտարարությունը և նաև սպասել բանակցությունների ընթացքին»: