Грузия Online-ի փոխանցմամբ՝ հոկտեմբերի 14-ին Թբիլիսիի Հավլաբար հայաշատ թաղամասում կանգնեցվելու է Գիորգի Դանելիայի հայտնի «Միմինո» ֆիլմի հերոսների հուշարձանը։
Վրացի հայտնի երգիչ և դերասան Վախթանգ Կիկաբիձեի պրոդյուսեր Սոսո Աբզիանիձեն հայտնել է, որ Հավլաբարում տեղադրվելու են Վալիկո Միզանդարիի, Ռուբիկ Խաչիկյան և Իվան Վոլոխովի քանդակները, որոնց ֆիլմում փայլուն մարմնավորել են Վախթանգ Կիկաբիձեն, Ֆրունզիկ Մկրտչյանը և Եվգենի Լեոնովը։ 4-րդ քանդակը նվիրված է լինելու անձամբ Դանելիային։
Հուշարձանի հեղինակը քանդակագործ և նկարիչ, Ռուսաստանի գեղարվեստի ակադեմիայի նախագահ Զուրաբ Ծերեթելին է։ Քանդակները ոչ վաղ անցյալում բերվել են Թբիլիսի և անվերադարձ հանձնվել Վրաստանին։
Աբզիանիձեն հայտարարել է, որ հուշարձանի բացման արարողությանը ներկա է գտնվելու Ֆրունզիկ Մկրտչյանի եղբայրը, ինչպես նաև Ռուսաստանում բնակվող նրա ազգական, ռեժիսոր Մհեր Մկրտչյանը։ Նույն օրը՝ երեկոյան, Թբիլիսիի ֆիլհարմոնիկում տեղի է ունենալու Կիկաբիձեի համերգը։
Երկու ամիս առաջ էլ Հայաստանի Դիլիջան քաղաքում բացվել էր «Միմինո»-ի դերակատարների՝ Վալիկոյի, Ռուբիկի և Իվանի հուշարձանը։ Այդ ժամանակ Վրաստանի մշակույթի նախարար Նիկա Ռուռուան Թբիլիսիում լրագրողներին հայտնել էր, որ այդ հուշարձանն ընդգծում է մարդկային մակարդակով մարդկանց անկեղծ բարեկամությունը, և որ այդպիսի հուշարձան տեղադրվելու է նաև Վրաստանում։
Հիշեցնենք, որ Գիորգի Դանելիայի «Միմինո» ֆիլմը էկրաններին է հայտնվել 1977 թվականին և դարձել խորհրդային դասական կինոնկար։
