Հնդկական մամուլը գրում է, որ Հայաստանը հնդկական Kalyani Strategic Systems Limited (KSSL) ընկերության կողմից մշակված 155 մմ/39 ինքնագնաց MArG հաուբիցների փորձարկումներ է անցկացրել՝ նախքան սպառազինությունը պատվիրելը։ «Kalyani Strategic Systems Limited ընկերության պաշտոնատար անձինք հայտարարել են, որ Marg 155/39 ինքնագնաց հաուբիցը մշակվել է 8 ամսում և փորձարկվել է հնդկական բանակի կողմից Բալասորում և Պոկրանում, նախքան այն առաջարկվել էր Հայաստանին, որը սպառազինության համակարգ էր փնտրում բարձրլեռնային շրջաններում ռազմական գործողություններ իրականացնելու համար, որտեղ Ադրբեջանի հետ հակամարտությունը շարունակվում է», – գրել է IDRW-ն: Ինքնագնացի վրա տեղադրված MArG 155/ 39 հաուբիցը մոտ 40 օրվա ընթացքում կրկին փորձարկվել է Հայաստանի պաշտոնյաների ներկայությամբ, և գործարքը կնքվել է պաշտպանական ոլորտի ցուցահանդեսում այն բանից հետո, երբ այն համապատասխանել է հայկական բանակի կողմից սահմանված հրաձգության բոլոր չափանիշներին:
Այս առնչությամբ, ռազմական փորձագետ Կարեն Հովհաննիսյանը «Առաջին լրատվական»-ի հետ զրույցում նշեց, որ այս զենքն իր բնույթով նորություն է և դեռևս ոչ մի տեղ չի կիրառվել, առաջին անգամ, ըստ էության, պետք է կիրառվի Հայաստանում, եթե դրա կարիքը լինի. «Ընդհանուր առմամբ, այդ զենքի բնութագիրը բավականին խոստումնալից է, որը կարծես թե, նախատեսված է բարձրլեռնային մարտերի կամ ռազմական գործողությունների համար: Կարելի է ասել՝ սա նոր սերնդի հաուբից է: Ամենակարևորն այն է, որ այն տեղայնացված է բարձրլեռնային գոտիների համար: Մյուս կարևոր բանը, որ մենք նկատում ենք զինտեխնիկայի ուսումնասիրության ժամանակ, այն է, որ ինքը դյուրաշարժ է, կարող է շատ արագ մարտական կրակ իրականացնելուց հետո տեղափոխվել այլ վայր: Այդ առումով ինքը առավելագույնս անխոցելի է դառնում:
Ես խուսափում եմ ասել՝ մենք նման բան ունեցել ենք, թե ոչ, որովհետև դեռևս պաշտոնապես չենք հայտնել, որ դա մերն է: Պետք է ուղղակի ասեմ, որ նմանատիպ զինտեխնիկա մեր արսենալում չի եղել»,-ասաց ռազմական փորձագետը:
Նա նաեւ հավելեց, որ այս զինտեխնիկայի տեխնիկական բնութագիրը կարդալով կարելի է ասել, որ այն բավականին հետաքրքիր է ու բավականին տեղայնացված է ռազմական գործողությունների համար բարձր լեռնային գոտիներում. «Շատ հետաքրքիր է, որ այս զինտեխնիկան ինքնուրույն տեղաշարժվում է. եթե այլ հաուբիցների դեպքում պետք է մենք ինքներս միջամտենք թիրախ ընտրելու ժամանակ, այս դեպքում ավտոմատ է ամեն ինչ ընտրվում, ավտոմատ հաղորդվում է տեխնիկային, տեխնիկան ինքը ինքնուրույն տեղաշարժվում, դիրքավորվում է և իրականացնում է մարտական կրակը»,-ընդգծեց Կարեն Հովհաննիսյանը:
