Իսրայելական Cursorinfo.co.il կայքի փոխանցմամբ՝ ԱՄՆ-ը ուղիներ է որոնում գնալով խորացող թուրք-իսրայելական ճգնաժամից դուրս գալու համար։ Թեև Երուսաղեմում ակնարկում են, որ շահագրգռված չեն Թուրքիայի հետ հակամարտության խորացմամբ, Անկարան որդեգրել է ավելի արմատական դիրքորոշում։ Այս մասին հայտարարել է իսրայելական կառավարությունում բարձրաստիճան աղբյուրը։
Նրա խոսքերով՝ Իսրայելի ոև Թուրքիայի միջև համագործակցությունը ծայրահեղ անկում է ապրել։ Չեղյալ են հայտարարվել համատեղ զորավարժությունները, զգալիորեն կրճատվել է առևտրի ծավալը։ Իսրայելական դիվանագիտության վրա բացասաբար է ազդել Թուրքիայի հետ հակամարտությունը, քանի որ Թուրքիան միջնորդ էր Իսրայելի և նրա հետ ուղղակի երկխոսելուց հրաժարված արաբական աշխարհի առաջնորդների միջև։
Թուրքիան արդեն իսկ հայտարարել է 3 իսրայելցի դիվանագետների վտարման մասին։ Դրանք են դեսպան Գաբի Լևին, որն արդեն իսկ վերադարձել է հայրենիք, ինչպես նաև Թուրքիայում Իսրայելի դեսպանատան աշխատակից Էլլա Օֆեկը և հյուպատոս Գերլ Էդրին։ Վերջիններս Իսրայել կժամանեն առաջիկա երկու օրերին։
Այս ամենի հետ մեկտեղ Թուրքիան դեմ չէ իր երկրում իսրայելական ռազմական և ոստիկանական առաքելությունների աշխատակիցների ներկայությանը, որոնք չունեն դիվանագիտական կարգավիճակ։
Հիշեցնենք, որ Թուրքիայից վտարվելուց հետո Գաբի Լևին հայտարարել է, որ այսուհետ Թուրքիա կմեկնի զբոսաշրջիկի կարգավիճակով։