Համաձայն QS ընկերության պատրաստած զեկույցի` Քեմբրիջի համալսարանը երկրորդ տարին շարունակ գլխավորում է աշխարհի ամենաբարձր վարկանիշն ունեցող համալսարանների ցուցակը: 2-րդ տեղում է մինչև 2010թ.-ը 6 տարի ցուցակը գլխավորած Հարվարդը, իսկ երրորդը Մասսաչուսեթսի տեխնոլոգիական ինստիտուտն է:
Աշխարհահռչակ մեկ այլ համալսարան` Օքսֆորդը, անցած տարվա համեմատ մեկ հորիզոնականով բարելավել է իր դիրքերն ու այժմ ցուցակում զբաղեցնում է 5-րդ տեղը: Ինչպես տեղեկացնում է BBC-ն, առաջին 20 ամենաբարձր վարկանիշն ունեցող համալսարաններից 13-ը ամերիկյան և 5-ը բրիտանական են: 17-րդ տեղում է կանադական McGill-ը, իսկ 18-րդը Շվեյցարիայի տեխնոլոգիական դաշնային ինստիտուտն է Ցյուրիխում:
Ասիական համալսարաններն այս ցուցակում նույնպես շատ բարձր վարկանիշ ունեն: Հոնգ-Կոնգի համալսարանը 22-րդն է, ճապոնական մի համալսարան` 25-րդը, իսկ Սինգապուրի ազգային համալսարանը 26-րդ տեղն է զբաղեցնում:
Առաջին անգամ աշխարհի ամենաբարձր վարկանիշ ունեցող 200 համալսարանների ցանկում հայտնվել է արաբական բարձրագույն ուսումնական հաստատություն` Սաուդյան Արաբիայի թագավորական համալսարանը:
Ընդհանուր ցուցակում աշխարհի 300 համալսարանների անուններ են:
Համալսարանների վարկանիշային ցուցակը կազմվել է ըստ մի քանի չափանիշների՝ բուհի հեղինակությունն ակադեմիական միջավայրում, մամուլում համալսարանի հիշատակման հաճախականությունը, շրջանավարտների հետագա հաջողություններն իրենց կարիերայում, օտարերկրյա դասախոսների և ուսանողների քանակը, ուսանողների և դասախոսների քանակի հարաբերակցությունը:
Ինչ վերաբերում է ուսման վարձերին, ապա Քեմբրիջի համալսարանում բակալավրիատում սովորելու համար ուսման վարձը 4-6 հազար դոլար է, մագիստրոսական կրթությունն արժե 14-16 հազար դոլար, իսկ Հարվարդում բակալավրում սովորելու համար պետք է վճարել տարեկան 36-38 հազար դոլար, իսկ մագիստրատուրայում` 38-40 հազար: Ընդ որում՝ Հարվարդում նման գումարներով կրթություն կարող են ստանալ միայն ԱՄՆ քաղաքացիները, իսկ օտարերկրացիների համար կրթությունն ավելի թանկ արժե:
Ամբողջական ցուցակին կարող եք ծանոթանալ այստեղ:
