Wikileaks-յան հրապարակումների մասին այսօր լրագրողների հետ հանդիպման ժամանակ խոսեց «Ղարաբաղ» կոմիտեի անդամ Աշոտ Մանուչարյանը:
Նա նշեց, որ այդ հրապարակումները համաշխարհային գիշատիչ համակարգի վերջին գործիքներից են իշխանությունն աշխարհում պահպանելու համար. «Բավական ունիվերսալ գործիք է, որով կարողանում են ցանկացած մարդու, համակարգի թիրախ դարձնել: Սա ինչ-որ տեղ նաև անբարոյականության գագաթնակետն է»:
Մանուչարյանը նկատեց, թե Wikileaks-ը ցույց տվեց, որ մարդիկ վստահել են Միացյալ Նահանգներին, նրա հետ տարբեր երկխոսությունների մեջ են մտել, և հենց որ ընդհանրական գիշատիչ համակարգին պետք է եղել օգտագործել այդ մարդկանց անկեղծությունը` աշխարհն ավելի կառավարելի դարձնելու համար, անմիջապես այս հրապարակումները բացահայտվեցին, քանզի, ըստ Մանուչարյանի, փողն ավելի բարձր է, այն աստված է, իսկ այդ մարդիկ՝ ընդամենը միջոց այդ աստծուն հասնելու համար:
Մանուչարյանի կարծիքով՝ Wikileaks-յան հրապարակումները գրեթե ամբողջությամբ ճշմարտությունն են արտացոլում, իսկ սուտ կարող են լինել ընկալողների գնահատականները, թե արդյոք ճշգրիտ է ընկալվել դա:
Հարցին՝ ճի՞շտ է արդյոք Wikileaks-ի այն հրապարակումը, թե Լևոն Տեր-Պետրոսյանը թմրաբիզնեսի հետ առնչություն ունի, Մանուչարյանը պատասխանեց, որ այդ հարցի վերաբերյալ արտասահմանյան մամուլում արդեն իսկ եղել են պարզաբանումներ. «Ուղղակի դիվանագետի կողմից օգտագործված՝ նախկին նախագահ արտահայտությունը ընկալվել է որպես Տեր-Պետրոսյան, չնայած Հայաստանը ոչ թե մեկ նախկին նախագահ ունի, այլ երկու»:
Աշոտ Մանուչարյանն առաջարկեց շատ չտարվել Wikileaks-ով, քանզի դա գործիք է, որն օգտագործվում է Հայաստանի նման երկրորդ կարգի ազգերին մանիպուլյացիայի ենթարկելու համար. «Ինչքան քննարկենք, ինչքան խորանանք այս ամենի մեջ, այնքան նրանց հնարավորությունները էլ ավելի են մեծանում»:
