Աշխարհաքաղաքական շահերի բախման էսկալացիա է մեր ռեգիոնում: «Առաջին լրատվական»-ի հետ զրույցում նման տեսակետ հայտնեց «Դեմոկրատական այլընտրանք» կուսակցության նախագահ Սուրեն Սուրենյանցը:
Սուրենյանցի խոսքով` բազմաշերտ պրոցես է տեղի ունենում, որը դժվար է կանխատեսել ինչպիսի հանգրվանի կհանգեցնի. «Բազմաշերտ պրոցես է, Հայաստանի մանևրելու հնարավորությունը քիչ է: Հաագայի որոշումից հետո արևմտյան մայրաքաղաքները դիլեմայի առաջ են: Հաագայի որոշումը չպետք է ֆետիշացնել, դժվար միջազգային կոնսոլիդացիա լինի Ադրբեջանին պատժելու ուղղությամբ: Քանի հայ-ադրբեջանական կոնֆլիկտը կա` Հայաստանը դաշնակից չի կարող ունենալ` սկսած ՌԴ-ից վերջացրած ԱՄՆ-ով: Հաագայի որոշումից մանանա չի թափելու մեր գլխին. սա նվազագույնն էր, որ Հայաստանը կարող էր անել: ՀՀ իշխանությունը համեստ հաղթանակները օգտագործում է որպես ինդուլգենցիա բերան փակելու համար, իսկ ընդդիմությունը` չարախնդալու համար»:
Սուրենյանցը վստահ է, որ ՌԴ-ն առանց հակազդեցության ու կոնֆլիկտի թույլ չի տալու էական ստատուս քվո փոխվի հօգուտ Արևմուտքի. «2020-ի հետպատերազմյան ստատուս քվոն կարող է վերանալ միայն նոր պատերազմով: Ժողովրդին պետք է պարզ ասվի` ինչ ենք զիջելու և դրա դիմաց ինչ ենք ստանալու»:
