Ռուսաստանի Պետդումայի ստորին պալատի նախագահ Վոլոդինը Մոսկվայում հանդիպելով Ադրբեջանի խորհրդարանի նախագահին, արել է հայտարարություններ, որոնք պարունակում են ակնառու սպառնալիք: «Եկեք ելնենք նրանից, որ կա որոշում՝ ընդունված պետությունների՝ Ադրբեջանի, Հայաստանի և Ռուսաստանի Դաշնության ղեկավարների մակարդակով։ Մենք սրանով կառաջնորդվենք և մեր կողմից կանենք ամեն ինչ, որպեսզի այդ պայմանավորվածությունները կյանքի կոչվեն: Իսկ նրանք, ովքեր հայտարարություններ են անում եվրոպական կառույցների ուղղությամբ, կարող են պարզապես կորցնել երկիրը: Եվրախորհրդարանին դիմելուց և այս մարմնին ինչ-որ հարցերի լուծմանը ներգրավելուց առաջ պետք է պատասխանեն՝ առհասարակ Եվրախորհրդարանի, ԵԽԽՎ-ի մասնակցությամբ ինչ-որ սուր հարց կամ կոնֆլիկտային իրավիճակ լուծվե՞լ է։ Նման օրինակ չկա», հայտարարել է Վոլոդինը, ասելով, թե եվրակառույցներին ներգրավել ցանկացողները պետք է տասն անգամ մտածեն, թե ինչով կավարտվի դա, հաշվի առնելով Ուկրաինայի, հարավսլավիայի եւ այլ օրինակներ: է 10 անգամ մտածեն և կշռադատեն, թե դա ինչպես կարող է ավարտվել՝ հաշվի առնելով Ուկրաինայի, Հարավսլավիայի և այլ երկրների օրինակը։ «Ով ուզում է խաղաղություն, ով ցանկանում է կարգավորել իրավիճակը, պետք է ոչ միայն հեռու մնա այս քվազի խորհրդարաններից՝ ԵԽԽՎ-ից և Եվրախորհրդարանից, այլ հստակ գիտակցի, որ նրանց ներգրավումը կսրի իրավիճակը, ավելի ու ավելի շատ խնդիրներ կստեղծի։ Իսկ եթե դա անում են, ուրեմն պետք է պատասխանատվություն կրեն հետևանքների համար»,-ընդգծել է Վյաչեսլավ Վոլոդինը։
Ու՞մ է սպառնում նա այդ հետևանքով: Եվրախորհրդարանն, ինչպես հայտնի է, շաբաթներ առաջ ընդունել էր բանաձև, կապված հայ-ադրբեջանական հակամարտության հետ:Նաև օրերս ներկայացվել էր բանաձևի նոր նախագիծ, որով դարձյալ դատապարտվում էր ադրբեջանական հարձակումը, կոչ է արվում ապաշրջափակել Արցախը, դուրս գալ Հայաստանի տարածքից: Միևնույն ժամանակ, կա Հայաստանի սահմանին ԵՄ դիտորդներ տեղակայելու որոշումը: Դրան զուգահեռ, կա նաև Եվրամիության սերտ գործակցությունը Բաքվի հետ՝ էներգետիկ հարցերում: Ի դեպ, փորձագիտական կարծիք կա, որ Բաքուն կարող է իր գազը ավելի շատ վաճառել Եվրոպա, դրա դիմաց ստանալ ռուսական գազ: Կլինի այդ մեխանիզմը, թե ոչ, վաղ է ասել, բայց որ կա ԵՄ-Ադրբեջան էներգետիկ համաձայնագրերի 2022 թվականի արդեն երկու հնչեղ օրինակ, ակնհայտ է: Եվ ուրեմն, Եվրոպայի ուղղությամբ աշխատանքի համար ու՞մ է սպառնում Վոլոդինը, Հայաստանի՞ն, թե՞ Բաքվին, եթե հաշվի առնենք, որ Բաքուն է ըստ էության բացել Եվրամիության ներգրավվածության ճանապարհը, ոչ թե Երևանը:
Ի վերջո, ո՞վ է մերժել Ռուսաստանի պլանը՝ հայ-ադրբեջանական խաղաղության համաձայնագրի մասով, որտեղ եղել է Արցախի կարգավիճակի հարցը անորոշ հեռանկարի թողնելու արձանագրում: Ադրբեջանը: Երևանը դրան տվել է իր համաձայնությունը: Ադրբեջանը մերժել է, ինչը գործնականում բացել է ԵՄ ներգրավվածության ճանապարհ, քանի որ Բաքուն այդ ներգրավվածությունից ստացել է նաև ավելի նպատակահարմար առաջարկ, ինչի մասին Հայաստանի վարչապետն ակնարկել է «նշաձողն իջեցնելու» վերաբերյալ հայտնի ելույթում: Բաքուն է, որ անում է ամեն ինչ, որպեսզի իրավիճակը դուրս բերի եռակողմ հայտարարություններից, մասնավորապես նոյեմբերի 9-ից, քանի որ 44-օրյա պատերազմից հետո այդ եռակողմ փաստաթղթերում է, որ Բաքուն ունի Լեռնային Ղարաբաղի գոյությունը ճանաչող ստորագրություն: Երևանն այդ գործընթացում պարզապես փորձում է ապահովագրել հայկական շահը հնարավոր տրանսֆորմացիայի պարագայում, ըստ այդմ ձգտում Բաքվից հետ չմնալ եվրոպական ուղղությամբ աշխատանքում, այն դեպքի համար, երբ ռուսական մոդերատորական ձևաչափը կհայտնվի լիակատար ճգնաժամում: Ի վերջո, այդ ձևաչափը պահպանելու խնդիրը Հայաստանինը չէ, որովհետև Հայաստանի համար դա իր ուժերից վեր խնդիր է: Եթե այդ խնդիրը չի կարող լուծել Մոսկվան, ապա Երևանը որևէ կերպ չունի այդտեղ լուծում ապահովելու հնարավորություն:
Այդպիսով, Վոլոդինն ու՞մ է սպառնում, Հայաստանի՞ն, որն ընդամենը փորձում է Ռուսաստանի անարդյունավետության պայմաններում գտնել Հայաստան-Արցախ անվտանգության և շահերի պաշտպանության, իրավունքների օրակարգայնացման հավելյալ մեխանիզմներ, թե՞ Ադրբեջանին, որը գործնականում հետևողականորեն տորպեդահարում է Վոլոդինի ասած եռակողմ ձևաչափը, փաստացի «ման ածելով» ՌԴ «քթից բռնած»՝ օգտվելով այն հանգամանքից, որ ուկրաինական պատերազմի խնդիրները բարձրացրել են Թուրքիայի և Ադրբեջանի նշանակությունը թե Ռուսաստանի, թե Արևմուտքի համար, իսկ Արևմուտքն էլ բնականաբար պատրաստ է խրախուսել իրավիճակը ՌԴ վերահսկողությունից դուրս բերելու Բաքվի ցանկացած գործողություն:
