Այսօր դատավարություն կընթանա ոչ միայն Եգիպտոսի նախկին նախագահ Հոսնի Մուբարաքի, այլ նաև Ֆրանսիայի նրա նախկին գործընկեր Ժակ Շիրակի նկատմամբ: Փարիզում ընթացող դատավարության ժամանակ քննվելու է նրա դեմ հարուցված գործը, համաձայն որի՝ Փարիզի քաղաքապետ աշխատելու տարիներին Շիրակը ստեղծել է կեղծ աշխատատեղեր, իսկ դրանց համար նշանակված աշխատավարձերը փոխանցվել են Շիրակի կուսակցությանը: Այս մասին հաղորդում է France Presse գործակալությունը:
Սակայն դատական նիստը հնարավոր է՝ հետաձգվի, քանի որ Շիրակի մոտ արձանագրվել է հիշողության կորուստ: Ինքը` Շիրակը, ժխտում է բոլոր մեղադրանքները և դիմել է դատարան` թույլատրելու փաստաբաններին ներկայացնել իր շահերը՝ առանց իր ներկայության:
Եթե Շիրակի մեղքը հաստատվի, ապա նա կլինի Երկրորդ համաշխարհային պատերազմից հետո առաջին բարձրաստիճան քաղաքական գործիչը, որին դատի են տվել: Շիրակի մեղքը հաստատվելուց հետո նա կարող է ազատազրկվել մինչև 10 տարի կամ վճարել մեծ տուգանք: Նշենք, որ 1940-ականների վերջին բանտում էին հայտնվել մի քանի վարչապետեր, որոնք համագործակցել էին նացիստական իշխանությունների հետ:
