ՀՀ ազգային ժողովի արտաքին հարաբերությունների մշտական հանձնաժողովի նախագահի թեկնածու Սարգիս Խանդանյանը հանձնաժողովի և ընդհանրապես խորհրդարանական դիվանագիտության այսօրվա հրատապ անելիքներից է համարում Լաչինի միջանցքի արգելափակման հետևանքով ԼՂ-ում առաջացած հումանիտար ճգնաժամի առավել ակտիվ հասցեագրումը, Ադրբեջանի կողմից ապօրինաբար պահվող հայ գերիների ազատ արձակման և հայրենադարձման, անհետ կորած և բռնի անհետացած անձանց ճակատագրերի պարզման հարցերը: Խանդանյանն այս մասին ասաց ԱԺ նիստում իր թեկնածության հարցի քննարկմանը:
«Արտաքին հարաբերությունների հանձնաժողովը կարևոր դերակատարում ունի խորհրդարանական դիվանագիտության աշխատանքները կազմակերպելու տեսանկյունից: Հայաստանի անվտանգային և արտաքին քաղաքական մարտահրավերներին դիմակայելու, մեր երկրի ասելիքն ու արտաքին քաղաքականությունն առավել ընկալելի ու տեսանելի դարձնելու համար կարևոր է շարունակել ակտիվորեն օգտագործել խորհրդարանական դիվանագիտության ողջ գործիքակազմը և այդ հարցում լինել առավել նախաձեռնողական»,-ասաց Խանդանյանը:
Այս առումով նա շատ կարևորեց համագործակցության բոլոր ձևաչափերի գործարկումը՝ բարեկամական խմբերի, միջխորհրդարանական հանձնաժողովների և միջազգային խորհրդարանական կազմակերպությունների շրջանակներում:
Խանդանյանն ընդգծեց, որ ԱԺ արտաքին հարաբերությունների հանձնաժողովն իր պատասխանատվության բաժինն ունի նաև կառավարության վարած արտաքին քաղաքականության նկատմամբ վերահսկողության համար: Այս համատեքստում չափազանց կարևորեց կառավարության գործընկերների, ԱԳՆ-ի հետ համագործակցությունը: Նա վստահեցրեց, որ ընտրվելու պարագայում մշտապես կապի մեջ է լինելու ՀՀ-ում հավատարմագրված դեսպանների և դիվանագիտական ներկայացուցչությունների հետ՝ փոխանցելու Հայաստանի դիրքորոշումները, ուղերձներն ու մտահոգությունները:
Խանդանյանը խոսեց հանձնաժողովի և ընդհանրապես խորհրդարանական դիվանագիտության այսօրվա հրատապ անելիքների մասին: «Առաջին հերթին առավել մեծ ակտիվությամբ անհրաժեշտ է հասցեագրել Ադրբեջանի կողմից ապօրինաբար Լաչինի միջանցքի արգելափակման և ԼՂ-ի շուրջ 2 ամիս շրջափակման հետևանքով առաջացած հումանիտար ճգնաժամը՝ հիմք ունենալով 2020-ի նոյեմբերի 9-ի եռակողմ հայտարարությունը և 2022թ դեկտեմբերի 14-ին ընդունված ԱԺ հայտարարության ուղերձները»,-ասաց Խանդանյանը:
Նա նկատեց, որ այս հարցով մի շար խորհրդարաններ և խորհրդարանական հարթակներ հանդես են գալիս հասցեական գնահատականներով և բանաձևերով, սակայն այս աշխատանքը բավարար կլինի միայն այն ժամանակ, երբ խնդիրը լուծվի, այսինքն՝ երբ ԼՂ-ն ապաշրջափակվի:
«Հաջորդը Ադրբեջանի կողմից ապօրինաբար պահվող հայ ռազմագերիների և այլ պահվող անձանց ազատ արձակման և հայրենադարձման, անհետ կորած և բռնի անհետացած անձանց ճակատագրերի պարզման հարցերն են՝ հաշվի առնելով այս խնդիրների նրբությունն ու բարդությունները: Միջազգային մեր շփումներում անհրաժեշտ է նաև շարունակաբար խոսել 2021 և 2022 թթ Ադրբեջանի սանձազերծած ռազմական գործողությունների և ագրեսիայի հետևանքով ՀՀ ինքնիշխան տարածք ներխուժելու և օկուպացնելու, թույլ տրված ռազմական հանցագործությունների և հետևանքների մասին»,-ասաց Խանդանյանը:
Այս հարցերն ամբողջությամբ չեն սպառում արտաքին քաղաքական օրակարգը: Իսկ հանձնաժողովի և խորհրդարանական դիվանագիտության առավել լայն օրակարգը Խանդանյանը համարում է ՀՀ-ի արտաքին քաղաքական առաջնահերթությունների, երկրի շահերի և առաջ եկած մարտահրավերների ներկայացումն ու առաջ մղումը:
