Փետրվարի 6-ին, գիշերը, 7.8 մագնիտուդ ուժգնությամբ երկրաշարժ է գրանցվել Թուրքիայի հարավ-արևելքում Սիրիայի հետ սահմանին: Թուրքիայում և Սիրիայում ավերիչ երկրաշարժից զոհերի թիվը հասել է գրեթե 1600-ի։
Թուրքիայի երկրաշարժերը տեղի են ունեցել Թուրքիայի հարավ-արևմտյան հատվածում՝ Միջերկրական ծովից ոչ հեռու՝ Սիրիայի սահմանին։ Սեյսմոլոգ Հրաչյա Պետրոսյանը նշում է, որ ՀՀ տարածքից բավականին հեռու է էպիկենտրոնը, և այս առումով Հայաստանին անմիջական որևէ վտանգ չի սպառնում։ Բացի այդ, չկա տեղեկատվություն, որ Հայաստանի որևէ բնակավայրում մարդիկ ինչ-որ բան զգացել են։
Պետրոսյանի խոսքով՝ ակտիվ է նաև Իրանի հյուսիս-արևմտյան հատվածում գտվող Խոյի օջախը․ այն գտնվում է Իրանի տարածքում՝ Թուրքիայի սահմանից ոչ հեռու։
«Դա շատ ավելի մոտ է ՀՀ-ին, և կոնկրետ ամենաուժեղ երկրաշարժի էպիկենտրոնի հեռավորությունը Սյունիքում մոտ 120 կմ է, Երևանից՝ 190 կմ։ Բնականաբար, Սյունիքում զգացվել է 4-5 բալ ուժգնությամբ, Երևանում՝ 2-3 բալ, այն էլ ոչ բոլորը զգացին, միայն առանձին հատվածներ»,-«Առաջին լրատվական»-ի հետ զրույցում ասաց սեյսմոլոգ Հրաչյա Պետրոսյանը։
Նրա գնահատմամբ՝ ճիշտ չէ ասել, որ մեր շենքերը սեյսմակայուն չեն․ մի մասը սեյսմակայուն է, հատկապես վերջին տարիներին հետխորհրդային Հայաստանում կառուցված շենքերը․
«Խորհդրային Միության փլուզումից հետո մենք սեյսմակայունության մեր հայրենական նորմերը ստեղծեցին, որտեղ վտանգվածությունը երկու բալով ավելի բարձր է, քան խորհրդային տարիներին հաշվարկված վտանգի աստիճանը ՀՀ-ի համար, հետևաբար այս երկու բալ ավելը նշանակում է, որ հետխորհրդային տարիների ընթացքում կառուցված շենքները պետք է լինեն ավելի սեյսմակայուն, քան նախկինում եղել են։ Ինչ վերաբերում է խորհրդային տարիներին կառուցված շենքներին, այո՛, կառավարությանը, հատկապես քաղաքապետարանին հայտնի են երրորդ կարգի վթարային շենքները, որոնք հիմնականում կառուցված են Աջափնյակ թաղամասում, և ըստ ֆինանսական հնարավորության՝ շենքերի մի մասն ամրացվում է և ըստ նպատակային մոտեցման՝ շենքների մի մասը քանդվում է, նորերն են կառուցվում։ Այնպես որ այդ խնդրին ուշադրություն դարձվում է՝ ըստ մեր ֆինանսական հնարավորության»,-ասաց նա։
Պետրոսյանի խոսքով՝ մենք ապրում ենք սեյսմակայուն երկրում, և մենք պետք է սովորենք ապրել երկրաշարժի հետ, իսկ առաջին հերթին դա նշանակում է, որ խուճապի չպետք է մատնվել։
«Մենք պետք է ամեն ինչ անենք, որ երկրաշարժը՝ որպես բնական երևույթ, չառաջացնի ավերվածություններ, մարդկային զոհեր, ենթակառուցվածքի վնասում, քայքայում և այլն։ Սա պետք է լինի մեր մոտեցումը, և մենք պետք է ապրենք երկրաշարժի հետ, և մենք պետք է ամեն ինչ անենք, որ բնական երևույթ կոչված երկրաշարժը, որը հնարավոր չէ կանխարգելել, հնարավորինս քիչ վնաս պատճառի, եթե այն տեղի ունենա»,-հավելեց սեյսմոլոգը։
