Աֆրիկայում կտրուկ նվազել է մալարիա տարածող մոծակների քանակը: Այս մասին տեղեկացնում է BBC-ն` նշելով, որ նման տեղեկություն է ստացվել դանիացի և տանզանիացի գիտնականների հետազոտության արդյունքում: Ուսումնասիրության մասին զեկույցը տպագրվել է Malaria Journal-ում:
Հետազոտություններն անցկացվել են Տանզանիայի Մասայկա և Կիրարե բնակավայրերում երկու փուլով: Առաջին փուլն ընդգրկել է 1998-2001 թվականները, իսկ երկրորդը` 2003-2009: Մոծակների վտանգավոր հատկությունն ուսումնասիրելու նպատակով օգտագործվել են լուսային հատուկ թակարդներ, որոնք տեղադրվել են տեղի բնակիչների տներում:
Ուսումնասիրության արդյունքում պարզվել է, որ Anopheles gambiae և Anopheles funestus տեսակի մոծակների քանակը, որոնք մալարիա են տարածում, կրճատվել է համապատասխանաբար 77 և 55%-ով: Գիտնականները նշում են, որ մոծակների քանակի նվազումը կապված է կլիմայական փոփոխությունների հետ, տեղումների հաճախականությունն այս տարիներին խախտվել էր:
Ըստ Առողջապահության համաշխարհային կազմակերպության տվյալների, մալարիայով տարեկան վարակվում է 240 միլիոն մարդ 108 երկրներում: Արդյունքում տարեկան մահանում է 850 հազար մարդ, որոնց մեջ երեխաները մեծամասնություն են կազմում:
