2022 թվականի հունվար-նոյեմբեր ժամանակահատվածում Հայաստանում սահմանային հատումների հաշվեկշիռը դրական է: Այս մասին «Առաջին լրատվական»-ի հետ զրույցում նշեց Վիճակագրական կոմիտեի մարդահամարի ժողովրդագրության բաժնի պետ Կարինե Կույումջյանը:
Նա ընդգծեց, որ ընդհանուր առմամբ, սահմանահատումների դրական հաշվեկիռը կազմել է 28 637, իսկ Հայաստանի Հանրապետության փաստաթղթերով անձանց կողմից իրականացված սահմանային անցումների տարբերությունը՝ – 23 458:
Հարցին, թե արդյոք սահմանահատումների հետ կապված լուրջ փոփոխություններ ունե՞նք, Կույումջյանը պատասխանեց. «Այս պահին նախորդ տարվա հետ համեմատություն չենք արել, որովհետև ապրիլից ենք սկսել ամսական կտրվածքով ստանալ սահմանահատումների տվյալները, ուստի նախորդ տարվա հունվար-նոյեմբերի հետ համեմատություններ չունենք»:
Նա նաև դժվարացավ ասել, թե Հայաստանից մեկնողները ո՞ր երկրներում են հանգրվանում, քանի որ վիճակագրության կոմիտեն ֆիքսում է, թե անձը որ երկրի անձնագրով է հատում սահմանը, բայց թե որտեղ է իր վերջին հանգրվանը՝ չի կարող ասելԱ:
ՄԱՀՀԻ ասոցացված փորձագետ, ժողովրդագրագետ Արտակ Մարկոսյանն էլ «Առաջին լրատվական»-ի հետ զրույցում նշեց, որ շուտով տարեկան վիճակագրությունը կհրապարակվի, կտեսնենք՝ հիմնականում որ երկրներ են գնում մեր հայրենակիցները։
«Որպես աշխատավայր, այո՛, ՌԴ-ն է մնում առաջին հորիզոնականում։ Եվրոպայում շատ դժվարացել է հաստատվելը, քանի որ ռուս-ուկրաինական պատերազմի հետևանքով այնքան փախստականներ կան Ուկրաինայից։ Ընդհանուր առմամբ՝ միգրացիոն քաղաքականությունն այնպիսին է, որ առաջնահերթությունը ուկրաինաացիներին է տրվում։ Պետք է հասկանալ՝ որ աշխարհում պետությունները հիմա ավելի քիչ են հակված ընդունել օտարերկրացիներ, և կան խնդիրներ, աշխարհն այլևս այնպես չէ, ինչպես կովիդից առաջ էր»,-ասաց Մարկոսյանը։
Այնուամենայնիվ, ՌԴ մեր հայրենակիցները շարունակում են մեկնել հիմնականում արտագնա աշխատանքի։ Մարկոսյանի խոսքով՝ միամտություն կլիներ սպասել, որ միանգամից կգան կթողնեն տուն-տեղ աշխատանք․
«Այդպես միանգամից չի լինում, և հաշվի առնենք, որ ՌԴ-ում, ի տարբերություն տարեսկզբի, երբ սկսվեց ռուս-ուկրաինական պատերազմը, երկնիշ տնտեսական անկման մասին էին խոսում, բայց 2,3 տոկոս անկում է գրանցվել, այսինքն՝ նախատեսվածից քիչ էր անկումը։ Բնականաբար, երկողներ եղան, բայց այնպես չէ, որ մենք շատ մեծ հոսք տեսանք մեր հայրենակիցիների կողմից»,-ասաց նա։
