Ռազմաքաղաքական հարցերով փորձագետ Արմինե Մարգարյանը ֆեյսբուքյան իր էջում գրել է․ Առաջին ագամ չէ, որ ամերիկյան կողմն Ադրբեջանին հորդորում է բացել Լաչինի միջանցքը, բայց երեկ տեղի ունեցած Բլինքեն-Ալիև հեռախոսազրույցը պարունակում է բավական նուրբ շեշտադրումներ:
Մասնավորապես՝
✅Պետքարտուղար Բլինքենը հորդորում է նախագահ Ալիևին անհապաղ բացել Լաչինի միջանցքը և ընդգծում է, որ ԼՂ հումանիտար ճգնաժամի ռիսկը խարխլում է Հայաստան-Ադրբեջան խաղաղության հեռանկարները:
Այլ բառերով՝ ամերիկյան կողմը Հայաստան-Ադրբեջան բանակցային գործընթացի ներկայիս անմխիթար վիճակի պատասխանատվությունը դնում է ադրբեջանական կողմի վրա:
✅Բացի այդ, Պետքարտուղարն ընդգծում է, որ Լաչինի միջանցքը և դրա փակումը ուղիղ կապ ունի Հայաստան-Ադրբեջան խաղաղության գործընթացի հետ, հետևաբար, այդ գործընթացը պետք է ներառի նաև ԼՂ հակամարտության հետ կապված հարցեր: Այլ բառերով՝ «ԼՂ հակամարտություն գոյություն չունի» և «իմ քաղաքացիներն են, ինչ կուզեմ կանեմ» ադրբեջանական շինծու թեզերը չեն աշխատում:
✅Հաջորդ կարևոր շեշտադրումն այն է, որ հեռախոսազրույցի ընթացքում «Լաչինի միջանցքի շրջափակում», «Հայաստան-Ադրբեջան խաղաղության գործընթաց», «դրա խափանման պատասխանատվություն» թեմաները ամերիկյան կողմը զուգորդում է Ադրբեջանում մարդու իրավունքների մեղմ ասած անմխիթար վիճակի մասին Ալիևյին հիշեցնելով: Պատահականությու՞ն՝ ոչ իհարկե: Նման քաղաքական նրբերանգները երբեք պատահական չեն լինում:
Ըստ էության, ամերիկյան կողմն ակնարկել է Ալիևին, թե ինչը կարող է օբյեկտիվորեն օգտագործվել իր դեմ, եթե նա շարունակի կինոյի տղա խաղալ, մանավանդ, երբ այդ կինոյի տղայի վարքագիծը ավելի ու ավելի է կրկնում մեր հյուսիսային դաշնակցի վարքագիծը:
➖➖➖➖➖➖➖➖➖➖➖➖
Հ.Գ. Արցախյան 44-օրյա պատերազմից ցայսօր ընդգծում եմ, որ Ալիևին հարվածելու են մարդու իրավունքների, օրենքի գերակայության, ժողովրդավարության գործիքակազմով, և մենք պետք է պատրաստ լինենք այդ գործիքակազմը աշխատեցնել մեր օգտին: Սեպտեմբերյան ագրեսիան, ՀՀ սուվերեն տարածքների օկուպացիան, Լաչինի միջանցքի շրջափակումը այդ գործիքակազմի առաջին շարքերում կարող են հայտնվել, եթե այն Հայաստանի և Արցախի համար սահմանվի որպես ռազմավարական նպատակ: