Ինչպես հաղորդում է RIA-Novosti գործակալությունը, Ուկրաինայի նախագահ Վիկտոր Յանուկովիչը հայտարարել է, որ ուկրաինական «Նավթոգազի» և «Գազպրոմի» միավորման տարբերակը չի դիտարկվում: «Չի լինելու (միավորում.- 1in.am)»,- ասել է Յանուկովիչը` պատասխանելով լրագրողի այն հարցին, թե արդյոք հնարավո՞ր է նման միավորում:
Ուկրաինան և Ռուսաստանը երեկ մի շարք հայտարարություններ են փոխանակել այս հարցի շուրջ: Մասնավորապես՝ վարչապետ Ազարովն ասել է, որ «Նավթոգազը» լուծարվելու է, հետևաբար «Գազպրոմի» հետ նախկինում ստորագրված պայմանագրերը, որոնք չէին բխում Ուկրաինայի շահերից, պետք է վերանայվեն: Սրան ի պատասխան՝ ռուսական ընկերության ղեկավար Ալեքսեյ Միլլերն ասել է, որ պայմանագրերի վերանայում և հետևաբար գների իջեցման հարց կքննարկվի միայն այն դեպքում, երբ երկու ընկերությունները միավորվեն:
Հիշեցնենք, որ երկու երկրների միջև գազային վեճը վերջին մի քանի ամիսներին սրվել է: 2009թ. Տիմոշենկոյի կողմից ստորագրված գազային պայմանագրերը Ուկրաինան համարում է անօրինական և Ուկրաինայի շահերից չբխող: Տիմոշենկոյի դեմ հարուցվել է քրեական գործ, իսկ անցած ամիս նա ձերբակալվել է:
