Սեպտեմբերի 1-ից ՄԱԿ-ի Անվտանգության խորհուրդը նախագահում է Լիբանանը: Լրագրողների հետ հանդիպման ժամանակ այդ երկրի մշտական ներկայացուցիչը ՄԱԿ-ում` Նավաֆ Սալամն ասել է, որ սեպտեմբերի հիմնական իրադարձությունը Գլխավոր ասամբլեայի 66-րդ նստաշրջանի բացումն է:
Օրակարգում կարող են հայտնվել նաև բազմաթիվ այլ հարցեր` ՄԱԿ-ի Անվտանգության խորհրդի անդամները հետևելու են Լիբիայի իրավիճակին, քննարկումներ են լինելու Սոմալիի, Հաիթիի և Աֆղանստանի հարցերով և այլն: Ըստ Լիբանանի ներկայացուցչի՝ Սիրիայի հարցով Անվտանգության խորհրդում շրջանառության է դրված բանաձևի երկու տարբերակ` բրիտանական և ռուսական: Պաղեստինի անկախության ճանաչումը նույնպես նախատեսվում է քննարկել սեպտեմբերյան նստաշրջանի ժամանակ: Նավաֆ Սալամն ասել է, որ Լիբանանը ճանաչում է Պաղեստինը որպես անկախ պետություն և ՄԱԿ-ում նման տրամադրություններ ունեն անդամ երկրների մեծ մասը:
