Անցնող տարին ճանապարհաշինության ոլորտի համար շատ հաջողված էր. ոլորտում ծախսվել է կրկնակիից ավելի գումար. ճանապարհային հիմնանորոգման վրա ծախսվել է նախորդ տարվա 23 միլիարդ դրամի փոխարեն՝ 40 միլիարդից ավելի, իսկ ընդհանուր ճանապարհաշինության վրա նախորդ 2021 թվականի 60 միլիարդի փոխարեն՝ 80 միլիարդ դրամ:
Ճանապարհաշինարարական աշխատանքների մեկ տարվա ամփոփման ժամանակ այս մասին հայտնեց ՀՀ տարածքային կառավարման և ենթակառուցվածքների նախարար Գնել Սանոսյանը՝ ընդգծելով, որ ճանապարհաշինությունը բավական մեծ և կարևոր ոլորտ է. «Շատ կարևոր է ոլորտի բոլոր մասնակիցներին հավաքել մեկ տեղում և միասին փորձել ամփոփել տարին, որպեսզի հասկանանք՝ ի՞նչ ունեինք, ի՞նչ ձեռքբերումներ, բացթողումներ և ի՞նչ նշաձող ունենք հաջորդ տարվա կամ տարիների համար, և միասին փորձենք դրանց իրականցման ուղիները գտնել»,- ասաց Սանոսյանը:
Նախարարը շեշտեց, որ ոլորտում մեծ ծավալի ներդրումներն են իրականացվում, որոնք իրենց մեծ ազդեցությունն են ունենում և՛ ոլորտում, և՛ երկրի տնտեսական կյանքում:
Ըստ նրա՝ այս տարի առաջին անգամ կարողացել են 500 կմ-ի նշաձողը հաղթահարել և 2022 թվականին ասֆալտապատվել է 530 կմ-ից ավելի ճանապարհ:
«Ինչպես նաև բավականին շատ ճանապարհներ նախապատրաստել ենք ասֆալտապատման, որտեղ 2023 թվականի գարնանը միանգամից կսկսվեն ասֆալտապատումները: Բազմաթիվ մրցութային պայմանագրեր այս աշնանը արդեն իրականացրել ենք, որպեսզի հաջորդ տարի գարնանը հնարավորինս շուտ աշխատանքները սկսենք: Հատուկ ուշադրություն է դարձվել նաև այն հատվածներին, որոնք վտանգավոր են երթևեկության տեսակետից, փորձել ենք այնպես անել, որպեսզի այդ հատվածները այլևս վթարավտանգ տեղեր չլինեն»,- նկատեց Սանոսյանը:
Անդրադառնալով նոր կառուցվող ճանապարհներին՝ նախարարը հայտնեց, որ 2022 թվականն այս տեսակետից իսկապես աննախադեպ է՝ ընդգծելով, որ նորանկախ Հայաստանի պատմության մեջ մեկ կամ երկու ճանապարհ է, որոնք նոր են կառուցվել, մնացած բոլորը՝ գոյություն ունեցող ճանապարհներն են վերանորոգվել:
«Այս տարի հատկապես Սյունիքում մենք բավականին շատ նոր ճանապարհներ կառուցեցինք և դեռ շարունակում ենք: Սա նոր խնդիր էր մեր առջև դրված, և ուրախությամբ պետք է նշեմ, որ այդ խնդիրները հիմնականում հաղթահարված են և մի շարք ճանապարհներ կառուցված են: Ինչպես նաև ճանապարհաշինարարության ոլորտը այս տարին ավարտում է ամբողջովին այլ տեխնիկական զինվածությամբ, մասնագիտական այլ կարողությամբ և որակական այլ հատկանիշներով»,- շեշտեց նախարարը:
Անդրադառնալով իրականացվող աշխատանքների որակին՝ Սանոսյանն ընդգծեց, որ, ցավոք, լինում են ոչ որակյալ աշխատանքներ, այդ իսկ պատճառով այդ ուղղությամբ աշխատող տարբեր մեխանիզմներ կան. «Ունենք աշխատանքային խմբեր և լաբարատոր սարքավորումներ, որոնք ստուգումներ են իրականացնում և հայտնաբերում են ստանդարտներին ոչ համապատասխան աշխատանքները: Ինչից հետո տալիս ենք ժամանակ շինարարներին՝ շտկելու թերությունը, կիրառվում են որոշակի ֆինանսական տույժեր, իսկ եթե չի շտկվում՝ այս դեպքում կարող ենք նաև չվճարել նման աշխատանքների համար»,- եզրափակեց Գնել Սանոսյանը:
ՀՀ ՏԿԵՆ «Ճանապարհային դեպարտամենտ» հիմնադրամի տնօրեն Գոռ Ավետիսյանն, անդրադառնալով հաջորդ տարվա անելիքներին, ընդգծեց, որ այս պահին արդեն ունեն շուրջ 90 միլիարդ դրամի նախահաշվային փաստաթղթեր, որոնց մի մասի վերաբերյալ մրցույթներն ամփոփվել են, արդեն ունեն գործող պայմանագրեր, առաջիկայում կհայտարարվեն նաև մնացած մասի մրցույթները: «Եթե շինարարական կազմակերպությունները պատրաստ եղան, մենք ամբողջությամբ այդ ծավալը կփորձենք իրականացնել և 2023 թվականին ճանապարհաշինության համար կունենանք նոր ցուցանիշներով տարի»,- ասաց նա:
Առանձնացնելով այս տարվա ամենակարևոր ճանապարհը՝ Գոռ Ավետիսյանը նշեց, որ այն Հյուսիս-հարավ ճանապարհի Թալին-Լանջիկ հատվածն է, որը հանձնվեց շահագործման: Նա հույս հայտնեց, որ հաջորդ տարի Հյուսիս-հարավից կփորձեն ևս երկու հատված ավարտին հասցնել:
