Ինչպես գրում է NEWSru.com կայքը, Ռուսաստանը, որը Լիբիայի հարցում հայտնվել է լուսանցքում, հիմա էլ կարող է լուրջ պարտություն կրել Սիրիայի հարցում: Նախօրեին Ռուսաստանի արտաքին գործերի նախարար Սերգեյ Լավրովը սուր քննադատության է ենթարկել Սիրիայի նախագահ Բաշար Ալ-Ասադի ռեժիմի դեմ միջազգային ճնշումներն իրականացնողներին: Փորձագետները նման գործելաոճը պայմանավորում են «գործող ռեժիմների հանդեպ ավանդական քաղաքակականությամբ, եթե նույնիսկ դրանք բռնապետություններ են», ինչպես նաև Տրիպոլիի հարցով կրած պարտության համար ռևանշ վերցնելու անհրաժեշտությամբ:
Սերգեյ Լավրովը երեկ Մոսկվայի միջազգային հարաբերությունների ինստիտուտում ունեցած իր ելույթի ժամանակ էլ ավելի է սրել Արևմուտքի և Ռուսաստանի հարաբերությունները Սիրիայի հարցով: Այս մասին գրում է Коммерсант-ը: Լավրովը արևմտյան պետություններին մեղադրել է ոչ կառուցողական գործելաոճ որդեգրելու մեջ, երբ վերջիններս փորձում են ամեն կերպ խստացնել պատժամիջոցները Ասադի նկատմամբ։ Սա Արևմուտքին ուղղված ամենասուր քննադատությունն է Սիրիայում ներքաղաքական հակամարտությունը սկսվելուց ի վեր: