Թուրքիայի նախագահ Էրդողանը հայտարարել է, թե Պուտինին դիմել է Սիրիայի նախագահ Ասադի մասնակցությամբ եռակողմ հանդիպում անցկացնելու համար: Այստեղ ուշադրության է արժանի այն, որ Էրդողանը «դուրս է թողնում» Իրանը, որի հետ կա այսպես ասած Աստանայի եռակողմ ռուս-թուրք-իրանական ձևաչափը: Չի բացառվում, որ Էրդողաննն այդ կերպ փորձում է ինչ-որ աստիճանով «կտրել» Պուտինին Իրանից և այդ ծառայությունն իր հերթին «մատուցել» Միացյալ Նահանգներին, որոնք մտահոգություն են հայտնում ռուս-իրանական դաշնակցության խորացման առնչությամբ:
Այդ ֆոնին տեղեկություն է տարածվում, որ Բելառոււսը Ուկրաինայի հետ սահմանին մոտեցնում է ծանր ռազմական տեխնիկա:
Միջազգային փորձագետները համարում են, որ Ռուսաստանն ու Բելառուսը ավարտում են նախապատրաստությունը և առաջիկայում մեծ հավանականությամբ կլինի Բելառուսի մուտքը ուկրաինական պատերազմ, հարված Բելառուսի ուղղությունից: Դրան զուգահեռ էլ տեղեկություններ են, որ ԱՄՆ-ը պատրաստվում է Կիևին փոխանցել Պատրիոտ հակաօդային պաշտպանության հրթիռային համակարգեր: Ըստ էության, նշմարվում է ուկրաինական պատերազմի էսկալացիայի նոր փուլ, նոր շրջափուլ՝ իր քաղաքական տրամաբանությամբ: Հնարավոր է, որ այդ փուլին ընդառաջ Ռուսաստանը փորձ է անում «կարգի բերել» իրավիճակը այսպես ասած թիկունքում, այդ թվում կովկաս-մերձավորարևելյան ուղղությամբ: Պետք չէ բացառել, որ Լաչինի միջանցքի շուրջ առկա իրավիճակը այդ մեծ գործընթացի մաս է, որտեղ խմորվում է Ուկրաինայում պատերազմի նոր ալիքին նախորդող ստատուս-քվո, նոր պայմանավորվածություններ, որոնք թույլ կտան Մոսկվային ստիպված չլինել այսպես ասած անընդհատ նայել հետ:
Ի դեպ, ուշադրության է արժանի այն, որ մոտ տասն ամիս առաջ՝ փետրվարի 24-ին պատերազմ սկսելուց առաջ Ռուսաստանը փետրվարի 22-ին Կրեմլում ստորագրեց Ադրբեջանի հետ դաշնակցային հուշագիրը: Հայկական կողմը թերևս պետք է դիտարկի իրադարձությունների զարգացման այդ շերտը, ստեղծված իրավիճակում ելքերի կամ լուծումների, քայլերի հնարավորությունները դիտարկելու և մշակելու համատեքստում:
