ԱՄՆ իշխանությունները պատրաստվում են դատական հայց ներկայացնել ընդդեմ ավելի քան 10 բանկերի, որոնց թվում են ԱՄՆ տարածքում գործող այնպիսի հայտնի ֆինանսական հաստատություններ, ինչպիսիք են Bank of America-ն, JPMorgan Chase-ը, Goldman Sachsն ու Deutsche Bank-ը: Այս մասին այսօր գրել է The New York Times-ը:
Բնակարանաշինության ֆինանսավորման ԱՄՆ դաշնային գործակալությունը մեղադրում է բանկերին ԱՄՆ խոշորագույն Fannie Mae և Freddie Mac հիփոթեկային գործակալություններին դիտավորյալ վնաս հասցնելու մեջ: Թերթի տեղեկություններով` բանկերը, իբր, հիփոթեկային այդ գործակալություններին վաճառել են ոչ հուսալի բաժնետոմսեր, որոնք ապահովված են եղել հիփոթեկային պարտավորություններով: Արդյունքում ԱՄՆ անշարժ գույքի շուկայի փլուզումից հետո Fannie Mae և Freddie Mac գործակալությունները կորցրել են 30 մլրդ դոլար: