ՀՀ պաշտպանության նախկին նախարար Դավիթ Տոնոյանի պաշտպանական խումբն այսօր հանդես է եկել հայտարարությամբ, «Դավիթ Տոնոյանի ձերբակալումից մեկ տարի և երեք ամիս անց վերջապես ավարտվեց մեղադրանքի կողմի գրավոր «ապացույցների» հետազոտումը, ինչպես նաև քննիչի կողմից փորձագետին ներկայացված հարցադրումների պատասխանների և հետևությունների հետազոտումը, որի ընթացքում չներկայացվեց որևէ փաստ, տվյալ, փաստաթուղթ, ինչը կարող էր հիմնավորել «վատնման» հանցակազմի առկայությունը, Դավիթ Տոնոյանին առաջադրված մեղադրանքում տեղ գտած որևէ ձևակերպում կամ այս ամբողջ ժամանակամիջոցում կալանավորման տակ գտնվելու անհրաժեշտությունը:
Ավելին, ներկայացված «ապացույցների» մի մասն առհասարակ վերաբերելի չէր մեղադրանքին կամ ոչինչ չէր հիմնավորում, իսկ մյուս մասը՝ հերքում էր մեղադրանքը, որի վերաբերյալ պաշտպանական կողմը արել է համապատասխան հայտարարություններ և ներկայացրել է հակափաստարկներ: Ամեն դեպքում՝ կարող ենք վերահաստատել, որ Դավիթ Տոնոյանին կալանքի տակ պահելու հիմքեր չկան»:
Այս առնչությամբ փաստաբան Ալեքսանդր Սիրունյանը «Առաջին լրատվական»-ի հետ զրույցում նշեց. «Փաստաբանների աշխատանքին չեմ կարող գնահատական տալ, մարդիկ իրենց գործն են անում: Փաստաբաններն ամեն ինչ անում են ի շահ իրենց վստահորդի և ամեն ինչ այդ առումով ճիշտ են անում: Բայց գործի առումով ուզում եմ մի հարց տալ՝ ի վերջո, այդ հրթիռները ժանգո՞տ էին, թե՞ չէ: Ասում են ժանգոտ չի ու հիմքում ի՞նչն են դնում: Ասում են՝ հրթիռ ուղարկողն ասել է՝ պապայի արև, ժանգոտ չէր: Այսինքն ծախողն ասում է՝ պապայի արև, լավ ապրանք եմ ծախել: Ընկեր, ժանգոտ է»:
Դիտարկմանը, որ շատերի դեպքում է եղել պաշտոնական դիրքի չարաշահում և այլ անօրինականություններ, բայց միայն Դավիթ Տոնոյանն է անազատության մեջ, և արդյոք դանդաղ չի ընթանում գործընթացը, փաստաբանն ասաց. «Հայաստանում բոլոր գործերն են դանդաղ և պաշտպանական կկողմն ամեն ինչ պետք է անի, որ այդ գործընթացը արագ ավարտվի: Որովհետև մարդն ունի ողջամիտ ժամկետում գործի քննության իրավունք: Մենք էլ ենք ուզում արագ իմանանք՝ վերջը, այդ ռակետը ժանգո՞տ էր, թե՞ ժանգոտ չէր, թռնող էր, թե՞ թռնող չէր: Եթե Դավիթ Գալստյանը ժանգոտ հրթիռի փոխարեն շատ մեծ չափերի բադրիջան կամ վարունգ բերեր, ասեր՝ սա ռակետ է, պետք է ընդունեի՞նք: Դավիթ Գալստյանն ի՞նչ մեղք ունի: Եթե Դավիթ Տոնոյանը ասում է, որ ինքը չի մեղավորը, թող բացատրի, թե պատասխանատուն ով է: Մենք որպես հասարակ քաղաքացիներ ուզում ենք իմանալ՝ ռակետներն ով ընդունեց, ժանգոտ է եղել, թե ոչ, թռավ, թե՞ չթռավ, ու ինչու: Եթե Տոնոյանը չի, թող ասի՝ ես ի՞նչ կապ ունեմ, ես նախարար եմ եղել, հո ամեն հրթիռը չեմ գնալու նայեմ»:
Հիշեցնենք, որ Դավիթ Տոնոյանն ու բանակին զինամթերք մատակարարած ընկերության տնօրեն Դավիթ Գալստյանը՝ Պատրոն Դավոն մեղադրվում են շուրջ 4,7 միլիոն դոլար հափշտակելու և կեղծիքներ, հանրորեն վտանգավոր արարքներ կատարելու մեջ։ Մասնավորապես, 2018 թվականին բանակի համար ձեռք են բերվել ավելի քան 4 հազար 200 ժամկետանց, տեխնիկական պահանջներին չհամապատասխանող հրթիռներն, որոնք հնարավոր չի եղել կիրառել պատերազմի ընթացքում։