Օրերս ԱՀ խորհրդարանը 27 «կողմ» ձայներով հավանության արժանացրեց «Քրեական օրենսգրքում փոփոխություններ կատարելու մասին» օրենքի նախագիծը, որով խստացվում են լրտեսության և պետական դավաճանության պարագայում սահմանվող պատիժները: Արցախի արդարադատության նախարար Ժիրայր Միրզոյանը ներկայացրեց՝ լրտեսություն և դավաճանություն են համարվում նաև միջազգային կազմակերպությանը կամ հասարակական կազմակերպությանը տեղեկություններ տրամադրելը:
Պետական դավաճանության դեպքում սահմանվում է 15-20 տարի ժամկետով կամ ցմահ ազատազրկում, իսկ լրտեսության դեպքում`12-20 տարի ժամկետով կամ ցմահ ազատազրկում:
Այս առնչությամբ, Արցախի ԱԺ պետական-իրավական հարցերի մշտական հանձնաժողովի նախագահ Սևակ Աղաջանյանը «Առաջին լրատվական»-ի հետ զրույցում նշեց, որ այս փոփոխության անհրաժեշտությունը ծագել է նրանից, որ Արցախում ավելացել են դավաճանության ու լրտեսության դեպքերը.
«Բոլորս էլ ականատես ենք եղել և հիմա էլ շարունակվում են դավաճանության գործերի բացահայտումները: Օրեցօր նոր դավաճաններ են բացահայտվում: Ես կարծում եմ, որ ավելի խիստ պետք է լինի պատիժը, բայց մեր Սահմանադրությունը թույլ չի տալիս, որ օրինակ, մահապատիժ կիրառվի: Քանի որ Սահմանադրությունը դա թույլ չի տալիս, ամենախիստ պատժատեսակը ցմահ ազատազրկումն է»,-ասաց նա:
Հարցին, թե արդյո՞ք սա զսպաշապիկ կլինի՞ այն մարդկանց համար, որոնք իրենց մտքի ծայրով անցկացնում են, որ կարող են ինչ-որ շահ ստանալ դավաճանություն գործելով, Սևակ Աղաջանյանը պատասխանեց. «Այո, դա պետք է զսպաշապիկ լինի, ուրիշ էլ ի՞նչ տարբերակ կա: Բոլորը կողմ էին այս օրենքին, միաձայն է ընդունվել»:
Նույն խնդրի առնչությամբ Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցը նշեց, որ չի կարծում, թե դա 44-օրյա պատերազմով է պայմանավորված. «Ավելի շուտ այն վիճակով է պայմանավորված, որում հիմա գտնվում է Արցախը: Կան շատ լուրջ մարտահրավերներ անվտանգային տեսակետից, ավելի շուտ դրանով է պայմանավորված։ Սա ինքնապաշտպանության և ընդհանրապես անվտանգային հարցերի սուր վիճակի մասին է վկայում, և պետությունը ձևավորում է քրեական պատասխանատվության գործիքներից մեկը, որ կարողանա պաշտպանի ինքն իրեն հնարավոր ոտնձգություններից, ինչի հավանականությունը շատ մեծ է: Սա նաև ուղերձ է հանրությանը, որ ԼՂ ինքնիշխանությունը, անվտանգությունը քաղաքական իշխանության կողմից ձևակերպվում և առաջնային պլան է մղվում:
Շատ բնական է, որ այդ խնդիրները լրջացել են, ոտնձգությունները պետության ինքնիշխանության դեմ այլ պետությունների, հատկապես հետախուզական ծառայությունների հետ համագործակցության առումով բավականին լուրջ են»,-ասաց նա: