Արդարացի է Լեռնային Ղարաբաղի հայության պահանջը՝ վերացնել ադրբեջանական զորքերի կողմից շփման գծի խախտումները և զորքերը դուրս բերել խաղաղապահների պատասխանատվության գոտուց, ինչպես նաև հրաժարվել ԼՂ հայության ցեղասպան քաղաքականությունից։ Այս մասին կառավարության այսօրվա նիստում ասաց վարչապետ Նիկոլ Փաշինյանը։
Ըստ նրա՝ ցեղասպան քաղաքականության դրսևորում էր 2022 թվականի մարտին աննախադեպ ցրտի պայմաններում Ադրբեջանի կողմից ԼՂ-ն բնական գազով ապահովող միակ խողովակի պայթեցումը և դրա վերականգնման տևական խոչընդոտումը։ Նույն ժամանակահատվածում Ադրբեջանի զինված ուժերի ստորաբաժանումները գիշերային ժամերին ուժեղ լուսարձակներով լուսավորում էին ԼՂ մի շարք հայկական գյուղերի կոնկրետ բնակարաններ, թաղամասեր, սպառնալիքներ տեղալով՝ բնակիչներին կոչ էին անում հեռանալ իրենց տներից՝ իսլամական աղոթքի հրավեր միացնելով։
«Եվ հիմա այս գործելակերպի հեղինակներն ուզում են Հայաստանին մեղադրել հակաիսլամական գործելակերպի մեջ, մինչդեռ իսլամական կրոնի և քաղաքակրթության նկատմամբ մեր հարգանքն աներկբա է։ ՀՀ-ն և հայ ժողովուրդը եղբայրական զգացմունքներ ու գործընկերային հարաբերություններ ունի տասնյակ իսլամական երկրների ու ժողովուրդների հետ, մինչդեռ Ադրբեջանն իր վերոհիշյալ գործելակերպով հիշեցնում է Իսլամը վարկաբեկող Ալ Կաիդային և Իսլամական պետությանը։ Այս ամենի մասին այսքան մանրամասն խոսում եմ, որովհետև տեսնում եմ, որ Ադրբեջանը ուխտադրույժ իր գործելակերպը փորձ է անում վերագրել Հայաստանին։ Բայց սա ինքնին խնդիր չէր լինի, եթե տեղի չունենար մի միջավայրում, երբ միջազգային և տարածաշրջանային անվտանգությունը բախվում է լուրջ մարտահրավերների»,- ասաց նա։