Ռիո դե Ժանեյրոյի քաղաքապետ Էդուարդ Պայեսն ասել է, որ իր քաղաքին սպառնում է դենգե տենդը, որն անբուժելի է և կարող է վերածվել համաճարակի: Նրա խոսքերով, համաճարակաբանները կանխատեսում են այդ հիվանդության աճ այս ամառ, որը հարավային կիսագնդում սկսվում է դեկտեմբեր ամսին:
Քաղաքում ստեղծված է օպերատիվ շտաբ, որը հետևում է ստեղծված իրավիճակին և դենգեի տարածման տեմպերին: Այն պետք է որոշում ընդունի դրան հակազդելու և կանխարգելիչ միջոցառումներ իրականացնելու վերաբերյալ: Սանիտարական աշխատակիցների թիվը մինչև ամառվա ավարտ կկրկնապատկվի: Այս մասին հաղորդում է RIA-Novosti գործակալությունը:
Տեղեկացնենք նաև, որ 2008թ. Բրազիլիայում նկատվել է այս հիվանդության կտրուկ աճ, որն այդ ժամանակ հասել էր համաճարակի շեմին: Այդ տարի հունվար-հունիս ամիսներին գրանցվել էր 162 հազար դեպք, որի հետևանքով զոհվել էր 123 մարդ: Դենգեի տարածման հիմնական պատճառը մեծ տարաներում բաց երկնքի տակ կուտակվող անձրևաջրերն են, որի հետևանքով բազմացող Aedes Aegypti մոծակները տարածում են դենգեն:
