BBC-ի ռուսական ծառայության փոխանցմամբ՝ այս տարվա առաջին կիսամյակին Լեռնային Ղարաբաղ են այցելել ավելի քան 3000 օտարազգիներ։ Այս մասին հայտարարել է ԼՂ արտգործնախարարությունը՝ հավելելով, որ դա 49-տոկոսանոց աճ է՝ համեմատած նախորդ տարվա միևնույն ժամանակահատվածի հետ։
3000 զբոսաշրջիկը մեծ չէ, սակայն այդ փոքրիկ տարածաշրջանի համար, որը վերջին 17 տարիներին գտնվում է «ո՛չ պատերազմ, ո՛չ խաղաղություն» պայմաններում, ամենափոքր առաջընթացն իսկ մեծ նշանակություն ունի սեփական պետականության կառուցման ճանապարհին։
ԼՂ ԱԳՆ-ի մամլո ծառայության տարածած հաղորդագրության մեջ նշված է. «Չնայած Ադրբեջանի իշխանությունների ստեղծած խոչընդոտներին և ԼՂՀ այցելած անձանց «անցանկալի անձ» հռչակելուն` Արցախի նկատմամբ հետաքրքրությունն աճում է»։
Բաքվի պաշտոնական ներկայացուցիչը քարոզչական է որակել այս հաղորդագրությունը։ Ադրբեջանի ԱԳՆ-ի մամլո քարտուղար Էլման Աբդուլաևը նշել է. «Հայաստանը գտնվում է տնտեսապես ծանր վիճակում։ Տարեկան այդ երկիրը լքում է 70-80,000 մարդ։ Այդպիսի հանգամանքներում ուռճացված տեղեկություններ են տարածվում ԼՂ այցելողների քանակի մասին։ Ո՞վ է գնում Ղարաբաղ։ Հայկական համայնքի ներկայացուցիչները»։
Միևնույն ժամանակ, ԼՂ-ում առաջնահերթ նշանակություն են տալիս զբոսաշրջության զարգացմանը։ ԼՂՀ կառավարությանը կից զբոսաշրջության վարչության պետ Սերգեյ Շահվերդյանի խոսքերով, Ղարաբաղում զբոսաշրջության զարգացմանը նպաստում են թե՛ կլիման, թե՛ բնությունը, թե՛ վաղ մշակույթի հուշարձանները. «Զբոսաշրջությունը ևս մեկ հնարավորություն է՝ մեր երկրի մասին արդար տեղեկատվություն տարածելու համար, չնայած Ադրբեջանի հարուցած խոչընդոտներին»։
Զբոսաշրջության զարգացումը ֆինանսավորվում է ոչ միայն ԼՂ դե ֆակտո իշխանությունների կողմից, այլև դրան աջակցում են հայկական սփյուռքի ներկայացուցիչները, ինչպես նաև ղարաբաղյան ծագում ունեցող և արտասահմանում բնակվող հաջողակ գործարարները։ Ղարաբաղում հուսով են, որ Ստեփանակերտի նոր օդանավակայանի բացումից հետո զբոսաշրջիկների հոսքը կավելանա։ Այն փակվել է 1992 թվականին՝ պատերազմի թեժ պահին, որից հետո տարածաշրջանը զրկվել է օդային հաղորդակցությունից։
Նոր օդանավակայանը նախատեսված է ժամում 100 ուղևոր սպասարկելու համար։ Թռիչքներն իրականացվելու են 50 տեղանոց CRJ-200 ինքնաթիռներով։ Ավելի վաղ նշվում էր, որ օդանավակայանի բացումը պետք է տեղի ունենար մայիսի 9-ին, սակայն հետագայում այդ տեղեկատվությունը չհաստատվեց։ Այժմ օդանավակայանում ավարտին են մոտենում նավիգացիոն ու ռադիոտեխնիկական սարքավորումների մոնտաժման աշխատանքները։
Ադրբեջանն ամեն գնով ընդդիմանում է օդանավակայանի բացմանը։ Նույն Էլման Աբդուլաևը նշել է. «Ղարաբաղը ճանաչված չէ անգամ Հայաստանի կողմից։ Յուրաքանչյուր թռիչք ապօրինի է։ Մենք այս կապակցությամբ մեր մտահոգություններն ենք հայտնել համապատասխան միջազգային կառույցներին»։
