Չեխիայի նախկին վարչապետ, երկրի խորհրդարանի ստորին պալատի անդամ Անդրեյ Բաբիշը, որը մեղադրվում է ԵՄ սուբսիդիաների հետ կապված խարդախության մեջ, հայտարարել է 2023 թվականին նախագահի պաշտոնում առաջադրվելու իր մտադրության մասին։ «Ես առաջադրվելու եմ Չեխիայի նախագահի պաշտոնում»,- գրել է նա իր Facebook-ում։
Չեխիայի կառավարության ղեկավար Պետր Ֆիալան Twitter-ում հայտնել է, որ նախկին վարչապետը, առաջադրելով իր թեկնածությունը ընտրություններում, միայն փորձում է անձեռնմխելիություն ստանալ։ Չեխիայի սահմանադրության համաձայն՝ երկրի նախագահը չի կարող քրեական պատասխանատվության ենթարկվել իր պաշտոնավարման ընթացքում։
Չեխիայի նախագահական ընտրությունները տեղի կունենան հաջորդ տարվա հունվարին։ Բաբիշի գլխավոր մրցակիցը կլինի նախկին գեներալ Պետր Պավելը, ով 2015-18թթ. գլխավորել է ՆԱՏՕ-ի ռազմական կոմիտեն։ Պետության ներկայիս ղեկավար Միլոշ Զեմանը իրավունք չունի առաջադրվել նախագահական երկու ժամկետից հետո:
