Քաղաքագետ Ալեքսանդր Մանասյանը այսօր լրագրողների հետ հանդիպում ունեցավ և զրուցեց Լեռնային Ղարաբաղի անկախության քսանամյակի թեմայի շուրջ։
Լեռնային Ղարաբաղի ազատագրական պայքարի կարևորությունը, ըստ բանախոսի, հայ պատմության մեջ ակնառու է, քանի որ դարերի մեջ առաջին անգամ մենք հետ բերեցինք կորցրածը։ Մանասյանի գնահատմամբ՝ այս քսան տարին փորձություն էր Ղարաբաղի համար, որը ԼՂՀ-ն հաղթահարեց և ժողովրդավարության առումով օրինակ է տարածաշրջանի շատ երկրների համար:
«Մեր անելիքը հիմա քարոզչությունն է: Մենք պետք է օգտագործենք այն փաստը, որ Արցախը դե ֆակտո հանված էր Խորհրդային Ադրբեջանի կազմից դեռևս անկախություն հռչակելուց առաջ: Այս և այլ շատ դրույթներ կան, որոնք պետք է օգտագործենք բանակցային գործընթացում։ Ադրբեջանի համար որևէ իրավաբանական փաստաթուղթ չկա, որով Ադրբեջանը կարող է հավակնել Լեռնային Ղարաբաղին»,- ասաց Մանասյանը։
Ալեքսանդր Մանասյանի խոսքով՝ պետք չէ այլևս այն սխալը թույլ տալ, թե մենք Լեռնային Ղարաբաղի շուրջ ստեղծել ենք անվտանգության գոտի. «Սա մեր դիվանագիտության թերությունն է, քանի որ մի մետր դուրս չենք եկել աշխարհագրական Լեռնային Ղարաբաղի տարածքից»:
