«ՌԴ նախագահ Վլադիմիր Պուտինը ռացիոնալ քաղաքական գործիչ է, որը, սակայն, զգալիորեն սխալվել է Ուկրաինա ներխուժելիս». նման հայտարարություն է արել ԱՄՆ նախագահ Ջո Բայդենը «CNN» հեռուստաալիքին տված հարցազրույցում, որից հատվածներ հրապարակվել են հոկտեմբերի 11-ի երեկոյան։
«Կարծում եմ, որ նա մտածում էր, թե իրեն գրկաբաց կընդունեն, որ Կիևը Ռուսաստանի մայրն է, և որ այստեղ նրան ուրախությամբ կընդունեն։ Ես կարծում եմ, որ նա պարզապես ամբողջությամբ սխալ հաշվարկ է կատարել»,- հայտարարել է Բայդենը լրագրող Ջեյք Թեփերի հետ զրույցում։
Պատասխանելով այն հարցին՝ արդյո՞ք նա նոյեմբերին Ինդոնեզիայում՝ «Մեծ քսանյակի» (G20) գագաթնաժողովին, կհանդիպի Վլադիմիր Պուտինի հետ, Բայդենն ասել է, որ հանդիպման համար լուրջ պատճառներ չի տեսնում: «Դա կախված կլինի նրանից, թե կոնկրետ ինչի մասին է նա ցանկանում խոսել»,- պարզաբանել է Սպիտակ տան ղեկավարը՝ հավելելով, որ եթե ՌԴ նախագահը ցանկանա քննարկել ռուսական բանտում գտնվող բասկետբոլի ամերիկացի աստղ Բրիթնի Գրայներին, ապա նա պատրաստ կլինի զրույցի: «Բայց լսեք, նա դաժանաբար է գործել։ Ես կարծում եմ, որ նա ռազմական հանցագործություններ է կատարել։ Եվ այդ պատճառով ես հիմա նրա հետ հանդիպելու իմաստ չեմ տեսնում»,- հավելել է Բայդենը։
