ՆԳ նախկին նախարար Սուրեն Աբրահամյանը, մեզ հետ զրույցում անդրադառնալով վերջին մեկ ամսվա ընթացքում ավազակային հարձակումներին, որոնք ոստիկանպետը որակել էր որպես բանդիտիզմ և վարկած հնչեցրեց, իբր թե հնարավոր է՝ դա իրավապահ համակարգի նախկին աշխատակիցներ լինեն, արձագանքեց.
«Որակման հարցում միանշանակ ճիշտ է, քանի որ կա կայուն, զինված խումբ, բանդիտիզմը ակնառու է: Ի միջի ալյոց, դա վաղուց պետք է արած լինեին, և հետո, վերջին հաշվով, Քրեական օրենսգիրքն է դա պահանջում: Հանցագործության կատարման մեխանիզմին և դրա մանրամասնություններին ես այդքան չեմ տիրապետում: Բայց որ պատրաստված ու փորձառու ավազակային խումբ է՝ դա միանշանակ է: Նրանց ֆիզիկական պատրաստվածությունն է հուշում, որ այդ վարկածը կարող է լինել, բայց դա միայն վարկածներից մեկը կարող է լինել»:
Մեր այն հարցին՝ այս խմբավորումը բացահայտման կարժանա՞, թե՞ ոչ, արձագանքեց. «Ես ձեզ ասեմ, որ դա ոստիկանության համար առաջին հերթին պատվի խնդիր է: Ընդ որում, եթե կարճ ժամկետում այդ հանցագործության բացահայտման ուղղությամբ առարկայական քայլեր չլինեն, ապա ոստիկանապետը շատ կտրուկ կազմակերպչական հարցեր պետք է դնի: Մարդիկ, որոնք զբաղվում են և պատասխանատու են քաղաքի իրավիճակի համար և այդ կոնկրետ հանցագործությունների բացահայտման համար միանշանակորեն պետք է պաշտոնանկ արվեն»:
