Ամերիկայի Միացյալ Նահանգները Հայաստանում գտնվող իր քաղաքացիներին կոչ է արել զգուշանալ ռուսական ավիաուղիներից օգտվելուց։ Այս մասին ասված է ՀՀ-ում ԱՄՆ դեսպանատան տարածած հայտարարության մեջ։ Ռուսական ավիափոխադրողները շարունակում են գործել Հայաստանում. ԱՄՆ դեսպանատունը տեղեկացնում է ԱՄՆ քաղաքացիներին, որ Դաշնային ավիացիոն վարչությունը (FAA) իջեցրել է Ռուսաստանի օդային անվտանգության վարկանիշը՝ հաշվի առնելով, որ Ռուսաստանի քաղաքացիական ավիացիայի մարմինը չի համապատասխանում Միջազգային քաղաքացիական ավիացիայի կազմակերպության (ICAO) անվտանգության չափանիշներին ռուսական ավիափոխադրողների գործունեության վերահսկման համար»,- ասվում է հայտարարության մեջ։
Նշվում է, որ այս զգուշացումը չի վերաբերում հայկական ավիափոխադրողներին։ «FAA օդային անվտանգության այս վարկանիշը չի տարածվում հայկական ավիափոխադրողների կամ ՀՀ-ին պատկանող կամ ՀՀ կողմից շահագործվող ինքնաթիռների վրա»,- ասվում է հայտարարության մեջ:
Ավիացիոն ոլորտի մասնագետ, ՀՀ վարչապետի՝ ավիացիայի գծով նախկին խորհրդական Հակոբ Ճաղարյանն «Առաջին լրատվական»-ի հետ զրույցում ԱՄՆ դեսպանատան հայտարարությունը բացատրեց հետևյալ կերպ․ «Քանի որ ռուսական օդանավերի պարկի ամենամեծ մասը կազմում են արևմտյան արտադրության օդանավերը, ռուսական ագրեսիային հետևող պատժամիջոցների հետ մեկտեղ սկսեցին կիրառվել օդանավերի հետվերադարձի, որովհետև նրանց մեծ մասը լիզինգով են և նրանց տեխնիկական սպասարկման հայեցակարգերը։ Այսինքն՝ ցանկացած օդանավ, ամեն առանձին շարժիչ ունի իր տեխնիկական սպասարկման կանոնակարգը, ռեգլամենտը։ Այդ ռեգլամենտն անընդհատ մշակվում է՝ թռիչքային պիտանելիության բյուլետեններ, սերվիս բյուլետեններ։ Դա հետևողականորեն փոխանցվում է շահագործողներին՝ այսինքն ավիաընկերություններին։ Հիմա և՛ «Բոինգը» և՛ «էյրբասը» և՛ ավելի փոքր արտադրողները, որոնք հիմնականում «Բոինգի» ու «էյրբասի» կազմում են, հրաժարվել են տեխնիկական սպասարկման փաստաթղթեր տրամադրել ռուսական ընկերություններին»։
Ըստ մեր զրուցակցի՝ դա է պատճառը, որ օդանավերը չեն սպասարկվում համապատասխան ռեգլամենտով․ «Իսկ եթե օդանավը, շարժիչներն ու համակարգերը չեն սպասարկվում ըստ համապատասխան արտադրողի ռեգլամենտի, այդ օդանավն արդեն թռիչքային պիտանելիության իրավունք չունի՝ ըստ միջազգային ստանդարտների։ Ռուսաստանը դա անում է ի հակասում միջազգային ստանդարտների՝ առանց արտադրողի փաստաթղթերի։ Այսինքն՝ արտադրողը, որ արտադրում է, ասում է՝ այս բաները պետք է անես, որ օդանավը թռիչքային պիտանելիություն ունենա։Ռուսաստանին չի տրամադրվում այդ ամենը։ Նույնն է, որ մեքենան գնես ու առանց տեխսպասարկման քշես այնքան՝ մինչև պայթի։ Այդ մենքենան անվտանգ չէ, մարդ տեղափոխել չի կարող, կանոններից դուրս է։ Իսկ Ռուսաստանի ավիացիոն իշխանությունները թույլ են տալիս, ասում են՝ թռեք, երբ կընկնի, կընկնի»։
ԱՄՆ-ի դեսպանատունը, ըստ Ճաղարյանի, դրա պատճառով է ասում՝ մի թռեք, այդ օդանավերն անվտանգ չեն․ «Որովհետև նրանք համապատասխան արտադրողի փաստաթղթերի տեխնիկական սպասարկում չեն անցնում»։
Հակոբ Ճաղարյանը միևնույն ժամանակ չի բացառում նաև քաղաքական գործոնը։
Ստացվում է, որ ռուսական ավիաուղիներից օգտվող ՀՀ քաղաքացիները ևս անվտանգ չեն, սակայն նրանց որևէ զգուշացում չի արվում։ Մեր զրուցակիցը համարում է, որ դա պետք է անի ՀՀ կառավարությունը, սակայն ըստ նրա՝ ՀՀ կառավարությունը չունի այնքան համարձակություն, որ ասի՝ ռուսական օդանավերով մի՛ թռեք, դրանք անվտանգ չեն։
