Քանի որ ես նաև քննիչ հանձնաժողովի անդամ եմ և բավականին ինֆորմացված եմ, տիրապետում եմ շատ ավելի ճչացող փաստերի, դրանք մենք կներկայացնենք մեր հանրության ոչ մոտ ապագայում, դա կլինի առնվազն 6, գուցե նաև ևս 6 ամիս հետո: Այս մասին «Առաջին լրատվական»-ի հետ զրույցում նշեց ԱԺ պաշտպանության, ազգային անվտանգության հարցերի հանձնաժողովի նախագահ, 44-օրյա պատերազմի հանգամանքներն ուսումնասիրող քննիչ հանձնաժողովի նախագահ Անդրանիկ Քոչարյանը:
«Այն ծավալի աշխատանքը, այն ծավալի փաստաթղթերը, որոնք մենք տեղափոխել ենք այստեղ մեր համապատասխան կահավորված սենյակ, որտեղ աշխատում են մեր փորձագետները, մեր հրավիրյալները, զինվորական մասնագետները, և պատրաստվում ենք երկրորդ փուլին, որտեղ արդեն կոնկրետ պատասխանատուները, կարևոր չի՝ իրենց մեղադրանք առաջադրվել է, կալանավորված են, թե ոչ, վերջիվերջո, մենք մեր ուսումնասիրությունները քննչական գործողություններ չեն: Մենք քննում ենք այն հանգամանքները, որոնք բերել են այսպիսի արդյունքների: Այդ հանգամանքների մեջ բազմաթիվ բաղադրիչներ կան, միայն մեղադրանքի ծավալում ներառվածը չի, այլ դրանք ծնող հանգամանքները, դրանց հետևանքները՝ կլինի քաղաքական, արտաքին քաղաքական, ներքին քաղաքական»,-ասաց նա։
