«Առաջին լրատվական»-ի հարցերին պատասխանել է Արցախի ԱԳ նախարար Դավիթ Բաբայանը
Պարոն Բաբայան, օգոստոսի 31-ին Բրյուսելում հանդիպելու են Փաշինյանը, Ալիևն ու Շառլ Միշելը: Արցախում ի՞ն չ սպասումներ, ակնկալիքներ կան այդ հանդիպումից:
Մենք միշտ կարևորել ենք ցանկացած հանդիպում, քննարկում, հաշվի առնելով նաև այն, որ յուրաքանչյուր հանդիպում որևէ ձևով չեն խախտելու այն կարմիր գծերը, որոնք կան, և հուսով ենք, որ այդպես էլ կլինի: Իսկ մեզ համար կարմիր գիծը մեկն է՝ մենք երբեք չենք լինելու Ադրբեջանի կազմում, դա անընդունելի է:
Վերջերս Բաքուն շատ կոշտ հայտարարությամբ հանդես եկավ ԵԱՀԿ Մինսկի խմբի համանախագահ 2 երկրների՝ ԱՄՆ-ի և Ֆրանսիայի հասցեին: Ընդհանրապես, այդ կառույցի գործունակության վերաբերյալ ի՞նչ սպասումներ կան:
Միանշանակ, դա Ադրբեջանից սպասելի էր, սա նորություն չէ, բայց բնական է, որ նման քայլը հետապնդում է քաղաքական, դիվանագիտական ոլորտում ընդհանրապես Արցախի գործոնը ոչնչացնելը, որովհետև հենց ԵԱՀԿ Մինսկի խմբի, եռանախագահության շրջանակներում ընթացող գործընթացների տարբեր փաստաթղթերում, հայտարարություններում հստակ նշված է, որ Արցախի Հանրապետությունը հանդիսանում է և հակամարտության կողմ, և խաղաղ բանակցային գործընթացի կողմ: Բնական է, որ Ադրբեջանը փորձում է ապամոնտաժել Մինսկի խմբի եռանախագահությունը կամ Մինսկի խումբը, որն, ի դեպ, Ադրբեջանի իրավասության մեջ չի մտնում, որովհետև այն ստեղծվել է կոնսենսուսի հիման վրա, տարբեր երկրների մասնակցությամբ, բայց այսպիսի նենգ խաղ է խաղում և փորձում է Արևմուտք-Ռուսաստան տարաձայնությունների վրա խաղալ, բայց չեմ կարծում, որ դա ընդունելի կլինի նաև Մինսկի խմբի բոլոր համանախագահող երկրների՝ ԱՄՆ-ի, Ֆրանսիայի և Ռուսաստանի համար: Պարզապես մեզ համար կարմիր գիծը մեկն է՝ մենք երբեք չենք լինելու Ադրբեջանի կազմում, դա անընդունելի է: Բնական է, որ դա մեզ համար անընդունելի է, և մենք այս պահի դրությամբ դեռևս չենք տեսնում Մինսկի խմբի եռանախագահությանն այլընտրանք: Ես արդեն նշել եմ, որ դրա նպատակներից մեկն էլ այն է, որ փորձեն Թուրքիային մտցնել եռանախագահության կազմի մեջ, ինչը մեզ համար բացարձակապես անընդունելի է: Այս ամենին մենք պետք է մոտենանք առանց սուտի դիվանագետների, քաղաքագետների, աշխարհաքաղաքագետների էմոցիոնալ մեկնաբանությունները հաշվի առնելու: Սա խաղ է, որը բարձր մակարդակով է իրականացվում, և մենք պետք է նույն ձևով ցուցաբերենք համապատասխան մոտեցում: Եթե պրոֆեսիոնալի դեմ դուրս են գալիս սիրողական կամ հարցից չհասկացող հոսանքներ, դա միշտ բերելու է պարտության: Հետևաբար, շատ զգույշ պետք է լինենք ու լավ հասկանանք՝ ինչ է կատարվում:
Արցախի խորհրդարանի ղեկավարը ողջունել էր ԱՄՆ-ի և Ֆրանսիայի դեսպանների՝ Արցախի օկուպացված տարածքներ չայցելելը: Դուք ինչպե՞ս եք սա գնահատում որպես Արցախի ԱԳ նախարար:
Իհարկե, դա ողջունելի է, դա քաղաքական ու մարդասիրական քայլ է: Միաժամանակ, պետք է հասկանալ, որ Ադրբեջանը սա օգտագործում է ոչ թե որպես պատճառ, այլ որպես պատրվակ Մինսկի խումբն ապամոնտաժելու: Շատ ավելի խորը գործընթացներ են գնում, հետևաբար, պետք է ավելի լավ հասկանանք իրավիճակը և պրոֆեսիոնալ մոտեցում ցուցաբերենք այս ամենի նկատմամբ: Մեր դեմ խաղում են շատ ուժեղ պատրաստված հոսանքներ ու թիմեր:
Խոսակցություններ կային, որ Ռուսաստանում ևս պետք է կայանա հանդիպում Հայաստանի և Ադրբեջանի ղեկավարների միջև, որը չկայացավ: Հիմա Բրյուսելում սպասվող հանդիպում Ռուսաստանի խանդը չի շարժի՞:
Ընդհանրապես, երբ մենք խոսում ենք իրավիճակի մասին, իսկապես, շատ պատմական իրավիճակում ենք ապրում: Ես անթույլատրելի եմ համարում, երբ որ փորձենք խաղալ այս կամ այն երկրների՝ մեկը մյուսի դեմ լինելու վրա: Մենք ոչ այդ ռեսուրսը ունենք, ոչ էլ պետք է մեզ այդպիսի բան: Ռուսաստանն էլ է մեզ համար եղբայրական երկիր, և մենք ունենք հնարավորություն բոլորի հետ լավ լինել, որովհետև ունենք Սփյուռք: Եթե դա չենք օգտագործում և փոխարենը մեկն օգտագործում է արևմտամետ, մյուսը ռուսամետ մոտեցում, դա ընունելի չէ: Արևմտամետ լինելու չափանիշը չպետք է լինի ատելությունը Ռուսաստանի դեմ կամ հակառամը: Ապուշ պետք է լինենք, որ այդպես անենք, դա կարող են անել հայրենիքը չսիրող մարդիկ: Հետևաբար, պետք է ամեն ինչ անենք, որպեսզի նպաստենք մեր երկրի, հայրենիքի գոնե փրկությանը: Իսկ Արցախն իսկապես ճակատագրական պահ է ապրում և անթույլատրելի եմ համարում այդ խաղերը, հատկապես լրատվական դաշտում այս կամ այն շհերը սպասարկող մարդիկ տարբեր բաներ են գրում: Օրհասական ու պատմական է պահը, պետք է ամեն ինչ անենք, որ փրկենք Արցախը: Եվ այստեղ լինել հակառուս, հակաամերիկացի կամ հակաֆրանսիացի, սա պարզապես կամ կատարյալ ապուշություն է, կամ դավաճանություն: Ուրիշ ոչ մի կերպ չեմ կարող որակել, առավելևս հիմա, երբ ամեն ինչը պետք է կոչենք իր անունով: Հետևաբար, պետք է հանդիպումներ տանենք տարբեր մակարդակներում, բայց երբեք չփորձենք այդ աշխարհաքաղաքական հսկաների խաղի մեջ մտնենք և ատելություն ցուցաբերենք այս կամ այն կողմի նկատմամբ: Մենք իրավունք չունենք նման բան անելու և ռեսուրս չունենք դրա համար: