«Առաջին լրատվական»-ի զրուցակիցն է ուկրաինահայ քաղաքական վերլուծաբան Մարատ Հակոբյանը։
-Ուկրաինայի նախագահի գրասենյակի ղեկավար Անդրեյ Երմակը հայտարարել է, որ Կիևը հուսով է, որ օգոստոսի 29-30-ը Որաինայի անվտանգության երաշխիքների մասին առաջին փաստաթուղթը լույս կտեսնի: Ի՞նչ նշանակություն ունի այն Ուկրաինայի համար, լրացուցիչ ի՞նչ օգուտներ կտա այս փուլում Կիևին։
– Պաշտոնական Կիևը Ուկրաինայի համար անվտանգության մոդել է ձևավորում՝ ակտիվորեն ներգրավելով բարեկամ երկրներին։ Ինչ վերաբերում է այսօր այս մոդելի ձևավորման ազդեցությանը, ապա մենք տեսնում ենք, որ գրեթե նույն երկրներն արդեն իսկ իրական օգնություն են ցուցաբերում ուկրաինական բանակի պատրաստման ու զինման հարցում։
–Հայաստանը կարո՞ղ է այսպիսի երաշխիքներ չունենալ, այն պարագայում, երբ Ռուսաստանը որպես դաշնակից ապացուցել է, որ անվտանգության երաշխիքներ տալու և պաշտպանելու սովորույթ չունի։
-Ես բազմիցս ասել եմ, որ Ռուսաստանի Դաշնությունը չի կատարել այն դերը, որը նախկինում ներկայացնում էին Երևանից։ Հիմա, երբ ռուսական «ռազմական մեքենան» խայտառակվել է ողջ աշխարհի աչքի առաջ, ակնհայտ է, որ այս երկիրը դեռ երկար ժամանակ չի կարող որևէ արդյունավետ բան առաջարկել այս ոլորտում։ Երևանը պետք է օրինակ վերցնի Կիևից և սկսի ձևավորել սեփական անվտանգության ճարտարապետությունը՝ նաև արևմտյան գործընկեր երկրների օգնությամբ։
–Ուկրաինայի անկախության օրը լրացավ նաև ռուսական զորքերի ներխուժման կես տարին։ Ի՞նչ ցույց տվեցին անցած վեց ամիսները, ինչքանո՞վ է պատերազմի ելքից կախված նաև հետխորհրդային մյուս երկրների՝ այդ թվում նաև Հայաստանի ճակատագիրը։
-Ուկրաինայում ռուսական ագրեսիայի օրացուցային վեց ամիսները ցույց տվեցին, որ Կրեմլի հավակնությունները իրականության հետ կապ չունեն, և ռուսական բանակը պարզապես կողոպտիչների, բռնաբարողների և քաղաքացիական անձանց մարդասպանների բանդա է: Պատերազմում Ուկրաինայի հաղթանակից հետո Եվրոպայում ուժերի հարաբերակցությունը զգալիորեն կփոխվի, մասնավորապես՝ Արևելյան Եվրոպայում, Հարավային Կովկասում, Կենտրոնական Ասիայում և նույնիսկ Մեծ Մերձավոր Արևելքում։ Պաշտոնական Երևանն արդեն նոր իրողություններին պատրաստվելու կարիք ունի. Հաշվի առնելով հայկական մեծ և կազմակերպված համայնքը, Հայաստանի և Ուկրաինայի միջև կարող են ձևավորվել յուրահատուկ հարաբերություններ: