2009 թ. հունիսին Երևանում փոխդեսպան Փենինգթոնը դիվանագիտական նամակ է հղել ԱՄՆ պետքարտուղարություն, որտեղ ներկայացրել է Երևանում կայացած քաղաքապետական ընտրությունների արդյունքների սեփական վերլուծությունը: Այս նամակը հայտնվել է WikiLeaks-ի տրամադրության տակ, որն էլ հրապարակել է այն:
Ամերիկյան դիվանագետին զարմացրել է այն, որ այն տեղամասերում, որտեղ գրանցվել է քաղաքացիների բարձր մասնակցություն, իշխող կուսակցության հաղթանակն առավել ակներև է եղել, ինչը կասկածի տեղիք է տվել դիվանագետին: Հատկապես կասկածի տակ են դրվում 7-րդ և 8-րդ ընտրատարածքների արդյունքները (Մալաթիա-Սեբաստիա): Փենինգթոնը նշում է, որ մի քանի ընտրատարածքներ, ուր մասնակցությունն այնքան էլ բարձր չի եղել, Հայ ազգային կոնգրեսը հաղթանակած Հանրապետական կուսակցությանը շատ մոտ արդյունքներ է ցույց տվել: Հատուկ նշվում է, որ վերահաշվարկի արդյունքում նվազել են ՀՀԿ-ին տրվող ձայները, մինչդեռ աճել են ԲՀԿ-ին և ՀԱԿ-ին հատկացվող տեղերի քանակը: Ներկայացված է նաև այլ վիճակագրություն:
Եզրակացության մեջ ամերիկացի դիվանագետը նշում է, որ որոշ տեղամասեր տարօրինակ արդյունքներ են գրանցել մասնակցության առումով, ինչը անչափ շատ է տեղական ինքնակառավարման ընտրությունների համար: Վերջում Փենինգթոնը շեշտում է, որ իրենք երբեք չեն կարողանա իմանալ, թե հանրապետական կուսակցությունը որքան ձայն է արդար ստացել, և որքանն է կեղծված եղել: «Այդուհանդերձ, դժվար է հավատալ, որ ՀՀԿ-ն արդար է հաղթել և ստացել է ձայների 40%-ը, որը բավարար էր ավագանում մեծամասնություն ունենալու և քաղաքապետ նշանակելու համար: Դժվար է նաև հավատալ, որ ՀԱԿ-ը հաղթել է 5 տեղամասում (439-ից), մինչդեռ 2008 թ. վիճարկելի ընտրությունների ժամանակ այդ թիվը 80-ից ավելի էր»,- գրում է Փենինգթոնը:
